Կալիֆոռնիացի թոշակառու Ռեյմոնդ Բաքսթոնը հայտարարել է փետրվարի 20-ին Powerball վիճակախաղի 425 մլն դոլար չափով ջեքփոթի նկատմամբ իր իրավունքների մասին, հայտնում է ITAR-TASS-ը՝ հղում անելով խաղարկության կազմակերպիչներին:
Թոշակառուն ներկայացրել է հաջողակ տոմսը Սակրամենտոյում գտնվող վիճակախաղի գրասենյակ և ընտրել ողջ գումարը միանգամից կանխիկ ստանալու տարբերակը: Այսիսով՝ մրցանակի գումարը կազմել է 242.2 մլն դոլար:
Հաղթողը պատմել է, որ կանգ է առել Կալիֆոռնիայի Միլպիտաս քաղաքի լցակայանում՝ ճաշելու և միաժամանակ վիճակախաղի տոմս գնելու համար: Մինչ նպարեղենի խանութից դուրս գալը նա ևս մեկ տոմս է գնել: Հենց դա էլ եղել է շահող տոմսը:
Նա նշել է, որ վիճակախաղ է խաղում շուրջ 20 տարի: Թոշակառուն հաջողության մասին ոչ ոքի չի պատմել մինչև իրավական հարցերը լուծելն ու շահումի նկատմամբ իրավունքը հայտարարելը:
Խոսելով ծրագրերի մասին՝ տղամարդը հայտնել է, որ մտադիր է շատ ճանապարհորդել, ինչպես նաև ստեղծել բարեգործական հիմնադրամ՝ մանկական հիվանդությունների բուժման համար:
