ԱՄՆ Ներկայացուցիչների պալատի անվտանգության հանձնաժողովի անդամ Մարկ Ուոքերը (Հյուսիսային Կարոլինա նահանգից, հանրապետական) մեղադրեց երկրի ռազմածովային ուժերին՝ չպարզված թռչող օբյեկտները (ՉԹՕ) թաքցնելու մեջ: Այս մասին հայտնում է Politico թերթը:
Դեռևս հուլիսին հետախուզական և հակաահաբեկչական ենթահանձնաժողովների ավագ հանրապետական Ուոքերը նամակ էր գրել ռազմածովային ուժերի նախարար Ռիչարդ Սփենսերին ՝ հետաքրքրվելով, թե ինչ է ձեռնարկում ռազմածովային ուժերի հրամանատարությունը ՝ ՉԹՕ-ի հետ շփումները հետաքննելու համար, և արդյոք որևէ օտարերկրյա կամ առևտրային ձեռնարկություններ մշակե՞լ են նոր տեխնոլոգիաներ, որոնք բացատրում են նման դեպքերը: Օրենսդիրը պահանջեց նաև շփումների «ֆիզիկական ապացույցներ» տրամադրել: Փոխնախարար Թոմաս Մոդլին հուլիսի 31-ին թվագրված նամակում պատասխանել է կոնգրեսականին, որ ռազմածովային ուժերը «շատ լուրջ են ընդունում այդ զեկույցները և շարունակում են արձանագրել ՉԹՕ-ի դիտումները և մանրակրկիտ ուսումնասիրել դրանք»:
Այնուամենայնիվ, Ուոքերը թերթին ասել է, որ հիասթափված է նավատորմի՝ ԱՄՆ զինված ուժերի համար վտանգ ներկայացնող օբյեկտների վերաբերյալ տվյալներ տրամադրելու ակնհայտ դժկամությունից: «Չնայած ինձ հուսադրում են նավատորմի փոխնախարարի խոսքերը, որը հաստատեց, որ ՉԹՕ-ի հետ շփումները մանրակրկիտ հետաքննվում են, սակայն հիասթափված եմ հստակ պատասխանների բացակայությունից այն սպառնալիքի վերաբերյալ, ինչը կարող է առաջացնել ԱՄՆ օդային տարածքում գերակշիռ [տեխնիկապես] թռչող ապարատը», – ասաց կոնգրեսականը:
Ծովային նավատորմի խոսնակ Ջո Գրադիշերը հրապարակմանը հայտնել է, որ իր հրամանատարությունը «այս թեմայի վերաբերյալ նոր տեղեկություններ ստանալու համար լրացուցիչ հարցում չի ստացել», բայց պատրաստ է պատասխանել Կոնգրեսի ցանկացած հարցին:
«Եթե ռազմածովային ուժերը կարծում են, թե Չինաստանը կամ Ռուսաստանն ունեն առաջատար օդատիեզերական տեխնոլոգիաներ, որոնք խոցելի են դարձնում ազգային անվտանգությունը, ապա ամերիկացի ժողովուրդը իրավունք ունի իմանալ, թե ինչ է անում իրենց կառավարությունն այս հարցում», – շեշտեց Ուոքերը:
