Business-Грузия-ի փոխանցմամբ՝ «Օկուպացիա» նախագծի շրջանակներում Տարածքային ամբողջականության վերականգնման գծով խորհրդարանական ժամանակավոր հանձնաժողովի նիստում կայացել է «Եռակի օկուպացում» 9-րդ փաստագրական ֆիլմի ցուցադրությունը։ Վերջինս պատմում է Լիտվայի, Լատվիայի ու Էստոնիայի խորհրդային օկուպացիայի մասին։ Այս ֆիլմը նկարահանվել է նախագահի հիմնադրամի աջակցությամբ։
Վերոնշյալ հանձնաժողովի նախագահ Շոթա Մալաշխիան հայտարարել է, որ մերձբալթյան երեք երկրների մասին նկարահանվելու են առանձին ֆիլմեր և թարգմանվելու են անգլերեն։ Դրանք ցուցադրվելու են թե՛ Մերձբալթիկայում, թե՛ մնացած բոլոր երկրներում, որոնք իրենց մաշկի վրա զգացել են խորհրդային օկուպացումը։
Ֆիլմի ցուցադրությանը մասնակցել է նաև Վրաստանում Լատվիայի դեսպանը։
Հիշեցնենք, որ մայիսի 13-ին էլ վրացական խորհրդարանում ցուցադրվել էր «Օկուպացիա» նախագծի շրջանակներում նկարահանված «Գերմանական աղետ» փաստագրական ֆիլմը, որում պատմվում է ԽՍՀՄ կողմից Գերմանիայի օկուպացիայի և գերմանացիների ցեղասպանության մասին: Մայիսի 27-ին էլ Վրաստանի խորհրդարանում ցուցադրվել էր լեհերի կրած զրկանքների մասին «Երկու Կատիններ» ֆիլմը։
Այն ժամանակ Շոթա Մալաշխիան նշել էր. «Ընդհանուր առմամբ, նկարահանվել է 22 փաստագրական ֆիլմ: Դրանցում ի ցույց է դրվում, թե ինչպես են ռուսներն օկուպացնում այլ երկրներ ու ցեղասպանություն իրականացնում այնտեղ: Այդ ֆիլմերը նախատեսված են վրաց հասարակության համար, սակայն դրանք ցուցադրվում են նաև այն 15 երկրներում, որոնցում իրականացվել են նկարահանումները»:
