Հայաստանի իրավապահ կառույցների և զինված ուժերի մի շարք ներկայացուցիչների կոչումները կբարձրանան: Նրանց թվում են նաև ոստիկանապետ Վալերի Օսիպյանը և ԱԱԾ տնօրեն Արթուր Վանեցյանը:
Վարչապետ Նիկոլ Փաշինյանը ֆեյսբուքյան իր էջում հայտնել է, որ որոշում է կայացրել ոստիկանապետ Վալերի Օսիպյանին և ԱԱԾ տնօրեն Արթուր Վանեցյանին գեներալ-մայորի կոչում շնորհել:
ԱԺ «Իմ քայլը» խմբակցության պատգամավոր Արմեն Խաչատրյանը կոչումներ շնորհելը նորմալ պրոցես է համարում։ «Գրեթե միշտ այդ ծառայության ղեկավարները եղել են գեներալ-մայոր և այս վերջին մեկ տարվա ընթացքում է, որ սահմանափակվում էին գնդապետի կոչումով: Իհարկե, կոչումները շնորհվում են անբասիր ծառայության, անցած ուղու համար, և ես սա դրական եմ գնահատում»,- մեզ հետ զրույցում ասաց նա։
Քաղաքագետ Ռոբերտ Ղևոնդյանը ուժայիններին պարգևատրելու իր բացատրությունն ունի։ «Հեղափոխությունից ի վեր այդ կառույցները դարձել են հեղափոխական արժեքների տարածման առաջամարտիկը։ Ինչպես Հայաստանի, այնպես էլ հետխորհրդային շրջանի ողջ հասարակությունը ավանդաբար ուժային կառույցների աշխատանքին ավելի մեծ ուշադրություն է դարձնում, քան իշխանության այլ թևերի աշխատանքին։ Այդ պատճառով ուժային կառույցները հասարակության, այսպես ասած, առաջնային աչքի առջև են և նրանց աշխատանքները հասարակության մեջ ավելի շատ են արձագանքներ գտնում»,- «Առաջին լրատվական»-ի հետ զրույցում ասաց նա։
Ղևոնդյանի խոսքերով՝ սա է պատճառը, որ անհրաժեշտություն է առաջացել խրախուսել ուժային կառույցների աշխատանքը. «Ընդհանրապես, սոցիալիստական հասարակություններին դա բնորոշ երևույթ է՝ առաջնային համարել ուժային կառույցների աշխատանքը։
Մոտ ժամանակահատվածում այդ տենդենցը կմնա նույնը։ Կարծում եմ՝ այն չի էլ փոխվելու՝ անկախ այն հանգամանքից՝ կլինի ժողովրդավարական, թե ավտորիտար իշխանություն։ Հասարակության մոտ միշտ էլ լայն արձագանք է գտնելու ուժային կառույցների աշխատանքը, մեր հասարակության տեսակն այնպիսին է, որ այդ աշխատանքն առաջնահերթ է դիտվում։ Իհարկե, կան այլ կառույցներ, որոնք կարևոր են՝ սոցիալական, կրթական, բայց հետխորհրդային բոլոր երկրների համար ուժայինը մնում է առաջնային»։
Մեր այն դիտարկմանը, թե կա կարծիք, որ ուժային կառույցներին խրախուսելը պայմանավորված է նաև նրանով, որ ինչ-որ պահի Փաշինյանը կարող է հենվել նրանց վրա, ստանալ աջակցություն, քաղաքագետը նշեց. «Անուղղակի կապվածություն՝ այն, որ ուժային կառույցները հավատարիմ են նոր իշխանություններին, վարչապետին՝ դա փաստ է, դա կա, բայց ուղղակիորեն համաձայն չեմ, որ ուժային կառույցներին «կաշառում են» հետագայում օգտագործելու համար։ Այսպես թե այնպես, ուժային կառույցները միշտ պատրաստ են»։
Մեր զրուցակցի կարծիքով՝ եթե դիտենք փաստերը, ապա թե՛ ԱԱԾ-ն, թե՛ ոստիկանությունը, թե՛ քննչական ծառայությունը գտնվում են վարչապետի ուղիղ ենթակայության ներքո. «Եվ իրենց գործողություններում, հայտարարություններում վարչապետի հետ համերաշխ են գործում, հակադրություններ ես չեմ տեսել։ Համենայնդեպս՝ այնքանով, որքանով տեսանելի է ու հասանելի է հասարակությանը։
Սաբոտաժային դրսևորումները ևս բացառելի չեն, բայց, ըստ Ղևոնդյանի, հասարակությանը հասանելի մակարդակում նկատելի է, որ ուժային կառույցների ու վարչապետի սինխրոնության մեջ խնդիր չկա։ «Վարչապետի կաբինետի հետ անհամաձայնություններ չկան։
Ավելին՝ ըստ իմ նկատած փաստերի, նույնիսկ ուժային կառույցների աշխատանքներն են միմյանց հետ համաձայնեցված։ Կարելի է դատական համակարգի խնդիրների մասին խոսել, բայց դա արդեն այլ թեմա է»,- եզրափակեց քաղաքագետը։
