ԲՀԿ նախագահ Գագիկ Ծառուկյանը բավականին նյարդային է արձագանքել Քննչական կոմիտե հարցաքննության ներկայանալու ծանուցագրի վերաբերյալ լրագրողների հարցերին: «Ինչ է, ծանուցագիրը պետք է շրջանակի մեջ դնեի և կախեի պատի՞ց՝ Այվազովսկու նկարի կողքին»,- ասել է Գագիկ Ծառուկյանը լրագրողներին: Նրան, իհարկե, գուցե հոգնեցրել են հարցերը, կապված Աբովյանի հրկիզման գործով հարցաքննության կանչվելու հետ, բայց ԲՀԿ նախագահի համար կա թերևս ավելի նյարդայնացնող պատճառ, քան հարցերը և հրկիզման գործը ընդհանրապես: Այդ պատճառն ունի անուն և ազգանուն՝ Սամվել Կարապետյան, որը հունիսի 16-ին Երևանում հանդիպել է Նիկոլ Փաշինյանի հետ, զրուցել սրճարանում:
Սամվել Կարապետյանն, ըստ «Ֆորբսի», ամենահարուստ հայն է, միլիարդատեր, որը թավշյա հեղափոխությունից հետո հետ է քաշվել թե՛ քաղաքական հավակնությամբ, որ ուներ մինչև այդ, թե՛ տնտեսական ծրագրերով՝ մեծ հաշվով սառեցնելով դրանք: Մինչդեռ, Փաշինյան-Կարապետյան հանդիպումը վկայեց, կամ առնվազն հիմք տվեց եզրակացնելու, որ նրանց միջև սառույցը գուցե հալվում է: Իսկ դա իր հերթին նշանակում է, որ փողը, առանց որի տնտեսական հեղափոխության անհնարինության մասին էր խոսում ԲՀԿ նախագահը՝ Փաշինյանին ցույց տալով այդ հարցում իր առավելությունը նրա նկատմամբ, Փաշինյանը կարող է և գտնել: Կասկած չկա, որ Սամվել Կարապետյան կարող է լինել խոշոր ներդրումների աղբյուր, իր հետևից բերելով նաև այլ ռուսաստանահայ գործարարների: Դա կնշանակի, որ Գագիկ Ծառուկյանը կարող է կորցնել իր քաղաքական՝ երևի թե միակ գործուն խաղաքարտը: Եթե այդ խաղաքարտը նա կորցնի, ապա դա հավասարազոր է լինելու քաղաքականության մեջ տեղը կորցնելուն:
Գագիկ Ծառուկյանը շաբաթներ առաջ պահեց մանդատը, ընդ որում՝ նույն իրավապահ կառույցների օգնությամբ, այս դեպքում ՀՔԾ-ի: Այդ մարմինը որոշեց, որ քաղաքականության մեջ ԲՀԿ նախագահը օտար մարմին չէ, գործարար, ձեռնարկատեր չէ, չկա այդ պատճառով նրան մանդատից զրկելու հիմք: Այն, ինչ չկարողացան անել իրավապահները, խոշոր հաշվով կարող է անել Սամվել Կարապետյանը, եթե ներդրումային հոսքերի վերաբերյալ պայմանավորվածություններ ձեռք բերի Նիկոլ Փաշինյանի հետ: Ծառուկյանը կպահի մանդատը, բայց կկորցնի անգամ նվազագույն կշիռը, որ պահպանել էր հեղափոխությունից հետո և թվում է, ամրապնդել էր Աբովյանի քաղաքապետի ընտրությամբ:
Փաստորեն, «հանձնելով» Աբովյանը, Նիկոլ Փաշինյանը «հարվածը» հասցնում է անսպասելի տեղից, թիկունքից, կամ ավելի շուտ՝ խորքից: Մյուս կողմից, սակայն, կա մեկ այլ հարց՝ Նիկոլ Փաշինյանին էլ հակակշիռ է պետք Սամվել Կարապետյանի հետ հարաբերությունում, եթե այնտեղ օրակարգում դրված են ներդրումային խոշոր պայմանավորվածությունների առնչվող հարցեր: Այստեղ, սակայն, Փաշինյանի համար հակակշիռ պետք է լինի ոչ թե մեկ այլ խոշոր սեփականատեր, այլ մեկ այլ ինստիտուտ՝ քաղաքական, հանրային կամ իրավական, որով անվտանգության և նաև պայմանավորվածությունների կատարման փոխադարձ երաշխիք կստանան թե՛ Փաշինյանը, թե՛ Կարապետյանը: Միակողմանի երաշխիքները, որևէ կոնֆիգուրացիայի դեպքում, անկախ անուն ազգանուններից և ձևաչափերից, չեն բերի կայուն և տևական զարգացման գործընթացի: Այդ դեպքում Ծառուկյանն էլ քաղաքականությունը կթողնի կամավոր:
