Մաքսային միությանը Հայաստանի անդամագրվելուն դեմ արտահայտված, Արցախում բնակվող ազատամարտիկները միանշանակ կարծիք չունեն այն մասին, թե կլինի՞ որևէ փոփոխություն, եթե ընդդիմադիր չորս ուժերը կարողանան հասնել հաջողության:
«Առաջին լրատվական»-ի հետ զրույցում ազատամարտիկ Մխիթար Ավետիսյանը կարծիք հայտնեց, որ այդ չորս ուժերի մեջ էլ այնքան հակասություններ կան, որ վստահություն չի ներշնչում, թե նրանք կարող են համախմբվել և իշխանափոխության հասնել։
«Ընդհանուր առմամբ, կուսակցությունների վարած քաղաքականությունը վստահություն չի ներշնչում: Մենք գիտենք, թե ԲՀԿ-ն ում կողմից է ստեղծվել, մենք նաև շատ լավ գիտենք՝ նախկինում դաշնակցականներն ինչպես են համագործակցել Ռոբերտ Քոչարյանի հետ, հետևաբար մեծ վստահություն չունենք, անգամ՝ ՀԱԿ-ի հանդեպ:
Կարծում եմ՝ առաջին նախագահը փորձում է ինչ-որ բան ստեղծել, ինչ-որ ձևով ակտիվացնել ու իրական ընդդիմադիր դաշտ քաշել ԲՀԿ առաջնորդին, բայց ինձ թվում է, թե ավելի ճիշտ կլիներ, որ համախմբվեին ոչ միայն չորս ընդդիմադիր կուսակցությունները, այլև Հայաստանում այսօր գործող հասարակական-քաղաքական կազմակերպությունները՝ այդ թվում՝ նաև «Նախախորհրդարանը»,- ասաց նա:
Մեր այն դիտարկմանը, թե հասարակական սեկտորը Հայաստանում հատկապես ԲՀԿ-ի մասով է անվստահություն հայտնում վերոնշյալ գործընթացին՝ ասելով, թե այդ կուսակցությունը Մարտի 1-ի ողբերգական իրադարձությունների հետ անմիջական առնչություն ունի, Մխիթար Ավետիսյանն արձագանքեց․ «Ես համամիտ եմ այնքանով, որքանով հետևում եմ ընդդիմադիր մամուլի և ընդդիմադիր գործիչների ասածներին, որոնք այդ ժամանակ ներկա են եղել իրադարձություններին։ Ես այդ ժամանակ Երևանում չէի և ստույգ ասել չեմ կարող, բայց հաշվի առնելով, որ Գ․ Ծառուկյանն այդ ժամանակ եղել է Քոչարյանի թիվ 1 վստահված օլիգարխներից, և քանի որ Մարտի 1-ն էլ ամբողջությամբ Քոչարյանն է կազմակերպել, հետևաբար չի բացառվում, որ նրա թիկնապահները հագուստ տրամադրեին»:
Հետաքրքվեցինք նաև, որ եթե անգամ այդ ուժերին հաջողվի համախմբվել և հաջողության հասնել, ի՞նչ է կարծում՝ այդ ուժերը Ղարաբաղի անվտանգության երաշխավոր լինել կարո՞ղ են։
«Եթե ուժերը, հասարակական կազմակերպությունները միասին իրականացնեն իշխանափոխություն՝ ես ընտրությունների միջոցով չեմ պատկերացնում, Հայաստանին Մայդան է հարկավոր, բայց ոչ, իհարկե, քարկոծելով կամ զոհերով, պետք է քաղաքացիական անհնազանդությամբ մինչև վերջ կանգնել ու փոխել իշխանությունը՝ ինչպես եղել է Ղարաբաղյան շարժման առաջին ամիսներին թե՛ այստեղ, թե՛ Երևանում:
Համենայնդեպս, Հայաստանում պետք է գնալ խաղաղ իշխանափոխության, Հայաստանում հնարավոր չէ ընտրություններով, Ղարաբաղում գուցե հնարավոր է»,-եզրափակեց Մխիթար Ավետիսյանը։
