Չինաստանը երկու երկրների միջև առևտրային պատերազմ սանձազերծելու ամբողջ պատասխանատվությունը դրել է ԱՄՆ-ի վրա և, միևնույն ժամանակ, բանակցելու պատրաստակամություն հայտնել: «Չինաստանն առևտրային պատերազմ չի ցանկանում, սակայն չի վախենում դրանից և, անհրաժեշտության դեպքում, կպայքարի մինչև վերջ»,- ասվում է «սպիտակ գրքում»՝ ՉԺՀ պետական խորհրդի հունիսի 2-ին հրապարակված ծրագրային փաստաթղթում:
Գրքում նշվում է, որ «բանակցությունների ընթացքում պետք է հարգել երկրի ինքնիշխանությունն ու արժանապատվությունը և երկու կողմերի միջև ձեռք բերված ցանկացած համաձայնություն պետք է հիմնված լինի հավասարության և փոխադարձ շահի վրա»:
Փաստաթղթում շեշտվում է, որ կան որոշակի սահմաններ, և Չինաստանը «սկզբունքային հարցերի» վերաբերյալ փոխզիջման չի գնա: Նշվում է նաև, որ Չինաստանը բավականաչափ ռեսուրսներ ունի Չինաստանի տնտեսության «առողջությունն» ապահովելու համար նաև լարվածության դեպքում:
ԱՄՆ-ի և Չինաստանի միջև առևտրային պատերազմն այս շաբաթվա վերջին հասել է նոր գագաթնակետի. հունիսի 1-ի գիշերը ուժի մեջ է մտել Չինաստանի կողմից ԱՄՆ-ի դեմ սահմանված նոր տուգանային տուրքերն՝ ի պատասխան չինական էկոնոմիկայի դեմ ներդրված ԱՄՆ պատժամիջոցների: Տուգանային տուրքերը սահմանված են 60 մլրդ դոլարի ամերիկյան 5140 ապրանքի վրա:
Չինաստանը նաև սպառնում է սահմանափակել էլեկտրոնիկայի և ավտոմոբիլների արտադրության մեջ կիրառվող հազվագյուտ մետաղների արտահանումն ԱՄՆ:
