Միացյալ Նահանգներում նոր սկանդալ է ծագել այն պատճառով, որ Թրամփի՝ Ճապոնիա այցի ժամանակ փորձել են նրա աչքից հեռացնել նախկին քաղաքական հակառակորդ, հանգուցյալ Ջոն ՄքՔեյնի անունը կրող նավը։ Այս մասին հայտնում է ամերիկյան մամուլը։
Համանուն ռազմանավը եղել է այն նավի կողքին, որի վրա Թրամփը ողջույնի խոսք պետք է ասեր զինվորականներին։ Նավն ամբողջությամբ չտեղափոխելու համար որոշվել է ուղղակի բրեզենտով փակել դրա անվանումը՝ «Ջոն ՄքՔեյն»։ Այդպես էլ արել են, ու որոշ ժամանակ անց այդ մասին տեղեկությունները հայտնվել են մամուլի տրամադրության տակ։
Դրանից հետո Թրամփին խիստ քննադատության է ենթարկել հանգուցյալ ՄքՔեյնի դուստրը, իսկ ԱՄՆ նախագահն արդարացել ու ասել, որ ինքը տեղյակ չի եղել։ Կարծես ձեռ առնելով՝ Թրամփն ավելացրել է, որ եթե նույնիսկ այդպիսի բան են արել, ապա դա արել են բարի նպատակներով։ Արդարացել է նաև Պենտագոնի ներկա ղեկավար, նախարարի պաշտոնակատար Պատրիկ Շանահանը՝ ասելով, որ ինքն էլ տեղյակ չի եղել այդ մասին։
