Ո՛չ Ռուսաստանը, ո՛չ Միացյալ Նահանգները, ո՛չ ԵԱՀԿ Մինսկի խումբը, ո՛չ ՄԱԿ-ը, ոչ ոք ոչինչ չի կարող անել Ղարաբաղի հարցում, եթե Բաքուն և Երևանը իրենք չցանկանան բանակցել, ասել է քաղաքական վերլուծաբան Դմիտրի Օռլովը:
Ինչ էլ որ ասեն, միևնույնն է Ղարաբաղյան խնդիրը ռազմական լուծում չունի, ասել է «Ռազմավարություն Արևելք-Արևմուտք» (Ղրղզստան) վերլուծական կենտրոնի գլխավոր տնօրեն Դմիտրի Օռլովը՝ պատասխանելով «Sputnik Ադրբեջանի» հարցերին, Բիշքեկի արձանագրության 25-րդ տարելիցի շեմին:
Բիշքեկյան արձանագրության գլխավոր ձեռքբերումն այն է, որ դրա ստորագրումից հետո հակամարտող կողմերի միջև հրադադարն ավելի իրական դարձավ, ասել է Օռլովը:
Բիշքեկյան արձանագրությունը 1992-1994 թթ. ղարաբաղյան պատերազմի ընթացքում արված հրադարարի կոչով հայտարարություն է, որը ստորագրվել է մասնակիցների կողմից ԱՊՀ երկրների միջխորհրդարանական վեհաժողովի, Ղրղզստանի խորհրդարանի, Դաշնային ժողովի և ՌԴ արտաքին գործերի նախարարության նախաձեռնությամբ անցկացված հանդիպման ժամանակ: Հանդիպմանը ներկա են եղել Հայաստանի, Ադրբեջանի, ԱՊՀ երկրների միջխորհրդարանական վեհաժողովի և միջնորդական առաքելության պատվիրակությունները: Ստորագրումը տեղի է ունեցել 1994 թ. մայիսի 5-ին Բիշքեկում:
Ի տարբերություն բոլոր նախորդ համաձայնագրերի, Բիշքեկյան արձանագրությանը հաջորդած Մոսկովյան 1994 թ.-ի մայիսի 12-ից ուժի մեջ մտնող հրադադարի մասին համաձայնագիրն (հենց այս արձանագրությունը հիմք հանդիսացավ համաձայնագրի ստորագրման համար) ի սկզբանե եղել է անժամկետ, դրա գործողության տևողությունը որևէ կերպ չի հստակեցվել, հիշեցրել է քաղաքական վերլուծաբանը: Եվ սա, նրա կարծիքով, 25 տարի առաջ Բիշքեկում կայացած բանակցությունների ամենակարևոր ձեռքբերումն է:
«Բայց շատ ավելի կարևոր է, որ բոլոր այդ պայմանավորվածությունների հետ համաձայնել են բոլոր կողմերը: Հետևաբար հրադարարի կատարումը մինչ օրս պարտադիր է բոլոր կողմերի համար»,- նշել է «Sputnik Ադրբեջանի» զրուցակիցը:
Խոսելով այն մասին, թե ինչպես են Բիշքեկում 25 տարի անց տեսնում ղարաբաղյան հակամարտությունը, Օռլովը նշել է, ինչպես այն ժամանակ, այնպես էլ հիմա իրավիճակը նույնն է. Ղարաբաղի խնդիրը ռազմական լուծում չունի, անկախ նրանից, թե ինչ են ասում:
Կարելի է անվերջ խոսել այն մասին, թե որքան ուժեղ է հայկական կամ ադրբեջանական բանակը, և ինչպես «մենք կջախջախենք թշնամուն», բայց հաղթանակի ոչ մի կողմը չի հասնի, քանի որ նրանք, ովքեր թելադրում են հակամարտության կանոնները, այդպիսի խնդիր չունեն, որ հաղթեն կա՛մ հայերը կա՛մ ադրբեջանցիները, ընդգծել է քաղաքական վերլուծաբանը:
