«Ամերիա» խորհրդատվական ընկերության հերթական հետազոտությունը նվիրված է Հայաստանում հեռահաղորդակցության ոլորտին: Հետազոտությունը ներառում է մալուխային հեռուստատեսային ծառայությունների շուկան, բջջային հեռախոսակապի ծառայությունների շուկան, ինտերնետ հասանելիության ծառայությունների շուկան, լարային հեռախոսակապի ծառայությունների շուկան, ինչպես նաև Երևանում հեռահաղորդակցության ոլորտի փոխլրացնող սարքավորումների (բջջային հեռախոսներ, դյուրակիր համակարգիչներ, պլանշետներ, հեռուստացույցներ և այլն) օգտագործումը:
Հետազոտության արդյունքները թույլ են տալիս գնահատել ոլորտի ներկա իրավիճակը, վերջին տարիների զարգացումները, վերլուծել հիմնական մասնակիցների գործունեությունը և կանխատեսել ոլորտի զարգացման միտումները:
Ինչպես վկայում է ուսումնասիրությունը, ֆինանսատնտեսական ճգնաժամի ազդեցությունը ՀՀ հեռահաղորդակցության ոլորտի վրա բավականին սահմանափակ է եղել: 2013թ.-ին ՀՀ հեռահաղորդակցության ոլորտի հասույթն ընթացիկ գներով (առանց ԱԱՀ) գերազանցել է 2008թ.-ի ցուցանիշը 7%-ով, ընդ որում 2013թ.-ին ոլորտի ամբողջ հասույթի գերակշռող մասը` 64%-ը, ապահովել է բջջային հեռախոսակապը, 17%-ը`ինտերնետ հասանելիությունը, 13%-ը`լարային հեռախոսակապը:
Հետազոտության արդյունքները ցույց են տալիս, որ Հայաստանի մալուխային հեռուստատեսային ծառայությունների շուկան հեռահաղորդակցության ոլորտի ամենաարագ աճող շուկաներից է, և 2008-2013թթ.-ին այս շուկայի հասույթն աճել է ավելի քան 4 անգամ:
Համաձայն հետազոտության արդյունքների` լարային հեռախոսակապը Երևանում դեռևս չի կորցրել արդիականությունը, 15-69 տարեկան բնակչության 68.7%-ն ամեն օր օգտվում է լարային հեռախոսակապից, թեև 98.4%-ն օգտվում է նաև բջջային հեռախոսակապի ծառայություններից:
Երևանում տնային տնտեսությունների բաշխումն ըստ համակարգչային տեխնիկա ունենալու հատկանիշի ուսումնասիրելիս Ամերիայի փորձագետները բացահայտել են, որ Երևանի տնային տնտեսությունների մոտ 55%-ն ունի միայն մեկ համակարգչային տեխնիկա, իսկ համակարգիչ, դյուրակիր համակարգիչ և պլանշետ միաժամանակ ունի Երևանի տնային տնտեսությունների միայն 8.5%-ը:
Հետազոտության արդյունքները վկայում են, որ հեռահաղորդակցության ոլորտում զարգացման ամենամեծ պոտենցիալ ունեցող շուկաներն են մալուխային հեռուստատեսային ծառայությունների և ինտերնետ հասանելիության ծառայությունների շուկաները: Ամերիայի փորձագետների կանխատեսմամբ հեռահաղորդակցության ոլորտի ավանդական ծառայությունները (լարային և բջջային հեռախոսակապ) առաջիկա տարիներին իրենց տեղը որոշակիորեն զիջելու են ինտերնետ հասանելիության ծառայություններին:
Հետազոտության արդյունքներն առավել մանրամասնությամբ կներկայացվեն սույն թվականի մարտի 4-ին նախատեսվող շնորհանդեսի ժամանակ, որին կմասնակցեն ոլորտի շահագրգիռ կողմերը, միջազգային կազմակերպությունների ներկայացուցիչներ, փորձագետներ և այլն: Հետազոտության ամբողջական տարբերակին կարելի է ծանոթանալ նաև այն պատվիրելով ընկերության կայքի միջոցով կամ զանգահարելով 56 11 11 հեռախոսահամարով:
