Այսօր՝ ապրիլի 18-ին, Ազգային ժողովում շարունակվում են աշխատանքները: Այժմ քննարկվում է ՀՀ Հանրային ծառայությունները կարգավորող հանձնաժողովի նախագահի ընտրության հարցը: Վարչապետ Փաշինյանը այդ պաշտոնում առաջարկել է Գարեգին Բաղրամյանի թեկնածությունը:
«Լուսավոր Հայաստան» խմբակցության պատգամավոր Արման Բաբաջանյանը իր ելույթում նախ զարմանք հայտնեց, որ «Էլեկտրիկ-Երևան»-ին մասնակցած պատգամավորները շատ պասիվ հանդես եկան:
Նրա խոսքով՝ թավիշը մի քիչ շատ է. «Եթե հեղափոխությունն ընթանար հեղափոխության դասական կանոններով՝ Գարեգին Բաղրամյանն այստեղ չէր լինի, ուրիշ տեղ նստած կլիներ հավանաբար»: Արման Բաբաջանյանը հավելեց. «Շատ ռիսկային եմ համարում ՀԾԿՀ նախագահի պաշտոնում Գարեգին Բաղրամյանի պաշտոնավարումը»:
Պատգամավորն ընդգծեց՝ ավելի քան 2 տասնամյակ այս հանձնաժողովը եղել է գործադիր իշխանության կցորդը և դակել է քաղաքական որոշումների արդյունքում կայացած սակագնային որոշումները. «Մենք տարիներ շարունակ տեսել ենք, թե ինչպես է հանձնաժողովը կատարում իշխանության հրահանգները՝ հատկապես մենաշնորհային կարգավիճակ ունեցող ընկերությունների սակագների որոշման ժամանակ»:
Դիմելով Գարեգին Բաղրամյանին՝ նա ասաց. «Դուք 15 տարի կարևոր պաշտոններ եք զբաղեցրել ՀԾԿՀ-ում, և մենք գեթ մեկ անգամ չենք լսել ձեր անկախ տեսակետը, ձեր ցասումն ու անհամաձայնությունը անգամ այն ժամանակ, երբ քաղաքացիներ էին դաժան ծեծի ենթարկվում ձեր իսկ կայացրած սակագների պատճառով: 15 տարիների ձեր հնազանդ աշխատանքից հետո հիմա դուք կկարողանա՞ք այդ հանձնաժողովը անկախ ղեկավարել և պաշտպանել ձեր մասնագիտական կարծիքը, եթե այն նույնական չլինի կառավարության կամ ներդրողների կարծիքի հետ: Ես խիստ կասկածում եմ, որ դուք կկարողանաք, պարոն Բաղրամյան. կոմֆորմիստ մարդն ինչպե՞ս կարող է անկախ հանձնաժողովի նախագահի պաշտոնում ապահովել այդ կառույցի անաչառությունը»:
Արման Բաբաջանյանը հարցեր հնչեցրեց՝ ակնկալելով եզրափակիչ ելույթում Գարեգին Բաղրամյանի պատասխանները:
Մանրամասները՝ տեսանյութում:
