Հնդկաստանի գերագույն դատարանն այսօր դադարեցրել է 7 հանցագորներից 4-ի ազատ արձակման ընթացակարգը, ովքեր մասնակից են երկրի նախկին վարչապետ Ռաջիվ Գանդիի սպանությանը: Անցած շաբաթ նման որոշում էր ընդունվել դավադրության մյուս երեք մասնակիցների նկատմամբ: Այս մասին հայտնում է ITAR-TASS-ը:
Ավելի վաղ Հնդկաստանի հարավային Թամիլնադ նահանգի դատարանը որոշել էր ազատ արձակել 7 ծայրահեղականների: Որոշումը հասարակությունում քննադատական ալիք էր բարձրացրել և բողոքարկվել Գերագույն դատարանում: Գերագույն դատական ատյանի վճռով՝ մեկ շաբաթվա ընթացքում որոշում կկայացվի այն մասին, թե Թամիլնադի դատարանն ունեցե՞լ է հանցագործներին ազատ արձակելու լիազորություն:
Ռաջիվ Գանդին սպանվել է 1991 թվականին՝ Շրի Լանկայում գործող թամիլյան անջատողական «Թամիլ իլամի ազատագրման վագրեր» խմբավորման պարագլուխների դավադրության արդյունքում: 1998-ի հունվարին սպանության մասնակիցները դատապարտվել էին կախաղանի: Մահապատիժը պետք է տեղի ունենար 2012-ի ամռանը, սակայն Չենայի քաղաքի գերագույն դատարանի որոշմամբ հետաձգվել է: Նույն տարի Գանդիին սպանողների բարձրագույն պատժի իրականացման հարցը փոխանցվել է Հնդկաստանի Գերագույն դատարանի դիտարկմանը:
