Այսօր ՀՀ կառավարության մոտ էր եկել Գեղարքունքի մարզի Ակունք գյուղի բնակիչ Մյասնիկ Պատվականյանը, որը նշում էր, որ տարիներ շարունակ իրենց խմելու ջրի հարցը չի լուծվում, իսկ նամակները, որոնք ներկայացվում են կառավարություն, վարչապետին, տեղ չեն հասնում:
Քաղաքացիների ընդունելության և դիմումների քննարկման վարչության պետ Ալեքսանդր Ղազարյանը «Առաջին լրատվական»-ի հետ զրույցում նշեց, որ չկա որևէ դիմում, որին ընթացք չտրվի, ավելին՝ քաղաքացին ինքը կարող է ամեն պահի ստուգել, թե իր դիմումը որ ժամին ուր է գնացել և ինչ ընթացք է ստացել:
«Եթե մարդը գյուղից գալիս է, հասնում այստեղ, որ ասի, որ իր տունը ջուր է լցվում, ինձ ավելի շատ մտահոգում է նրա հոգեկան առողջությունը»,- ասաց Ալեքսանդր Ղազարյանը, ապա լրագրողներին ուղեկցեց և ցույց տվեց, որ քաղաքացու դիմումներն ընդունվել են. 2011-ին նա նամակ է գրել դարձյալ ջրի խնդրով:
Հանձնարարական է տրվել, որ Գեղարքունիքի մարզպետարանը պետք է զբաղվի խնդրով, դիմումը պետք է քննության առնվի և արդյունքների մասին տեղյակ պահվի դիմողին:
Մյասնիկ Պատվականյանը նշեց, որ իրենց գյուղապետ Արծրուն Ղարիբյանը կեղծ գրություններ է ուղարկում կառավարություն, որ բնակիչների խմելու ջրի խնդիրը լուծված է, մինչդեռ շուրջ 30 տնտեսություն խմելու ջուր չունի:
