Ադրբեջանական ANS PRESS-ի փոխանցմամբ՝ Ադրբեջանի իշխող «Ենի Ազերբայջան» կուսակցության (ԵԱԿ) գործադիր քարտուղար Ալի Ահմեդովը մեկնաբանել է Իրանի խորհրդարանի խոսնակ Ալի Լարիջանիի առաջարկը, որն առնչվում էր ղարաբաղյան հակամարտության կարգավորման հարցում Իրանի միջնորդական առաքելությանը։
Ահմեդովը ցավով նշել է, որ, թեև ղարաբաղյան հակամարտության կարգավորմամբ զբաղվում է ԵԱՀԿ Մինսկի խումբը, այնուամենայնիվ, դեռ արդյունքներ չկան։ Միևնույն ժամանակ նա ընդգծել է, որ այդ երեք երկրները (ԱՄՆ, Ռուսաստան ու Ֆրանսիա) օժտված են մեծ հնարավորություններով։
Ղարաբաղյան հակամարտության կարգավորման հարցում Իրանի միջնորդական առաքելության վերաբերյալ Ահմեդովը նշել է, որ Իրանը կարող է զգալի ազդեցություն և մեծ ներդրում ունենալ հակամարտության կարգավորման հարցում։
Հիշեցնենք, որ Լարիջանին Ադրբեջանում հայտարարել էր, որ Իրանը կողմնակից է տարածաշրջանային մակարդակով ղարաբաղյան հակամարտության կարգավորմանը, և եթե տվյալ հարցով իրեն դիմեն, ապա Իրանը պատրաստ է ջանքեր գործադրել այդ ուղղությամբ.
«Մենք մշտապես հանդես ենք գալիս հակամարտությունների տարածաշրջանային կարգավորման օգտին, քանի որ տարածաշրջանի երկրներն առավել լավատեղյակ են դրանցից, և առավել լավ են ճանաչում միմյանց։
Ադրբեջանն ընտրել է Մինսկի խմբի ձևաչափը, սակայն մենք Մինսկի խմբի անդամ չենք։ Եթե Ադրբեջանը ցանկանա, ապա Իրանը պատրաստ է ցուցաբերել իր աջակցությունը»։
