«Երբ գրում են Հայաստանի իշխանությունների ներսում իբր տեղի ունեցող խմորումների մասին, այդ ամենը հորինվում է 3 սենյակում». իր ասուլիսի ընթացքում նման հայտարարությամբ է հանդես եկել ՀՀ վարչապետ Նիկոլ Փաշինյանը։ Նա հավելել է, որ ինքն այդ 3 սենյակների տեղերը գիտի. «Եվ այդ 3 սենյակներում գործող անձանց մի մասն արագ-արագ գալիս է, մեզ պատմում է, թե այդտեղ ինչ է տեղի ունեցել»։
Քաղաքական մեկնաբան Արմեն Բաղդասարյանն «Առաջին լրատվական»-ի հետ զրույցում նշեց՝ թեպետ ինքը չի կարող ասել, թե ինչ 3 սենյակների մասին է խոսել վարչապետը, այդուհանդերձ կարելի է ենթադրել, որ նա նկատի ուներ Ռոբերտ Քոչարյանի թևը, ՀՀԿ-ի թևը, և գուցե իշխանության ներսում կան այնպիսի պաշտոնյաներ, որոնք պատշաճ արագությամբ չեն իրականացնում հասարակության ակնկալիքները՝ ժողովրդից և պետությունից թալանածի վերադարձի տեմպերն այդքան էլ արագ չեն. «Պատճառը որոշ պաշտոնյաներ են, որոնց նա կոչ արեց ուղղակի ավելի կոնկրետ քայլեր ձեռնարկել, հակառակ դեպքում այդ քայլերն ինքը կձեռնարկի»։
Ըստ Բաղդասարյանի՝ սա վկայում է ոչ թե իշխանությունների ներսում առկա ճաքերի կամ առճակատումների մասին, այլ այն մասին, որ իշխանության ներսում միասնական դիրքորոշումը որքան էլ որ կա, քայլերի վճռականության հետ կապված կան տարաձայնություններ: «Այսինքն՝ ավելի կոշտ քայլերի կողմնակիցներ և ավելի մեղմ քայլերի կողմնակիցներ։ Այսինքն՝ մարտավարական առումով կան տարաձայնություններ, ինչը նորմալ է, որովհետև ամեն դեպքում Հայաստանը միապետություն չէ, և մեկ մարդու որոշումներով չէ, որ ամեն ինչ պետք է կատարվի։ Այդ քննարկումները նորմալ և նույնիսկ դրական եմ համարում»,- ընդգծեց նա։
Մեր զրուցակիցն այն կարծիքին է, որ դրսի ընդդիմությունն իշխանության համար շատ ավելի մեծ խնդիրներ կարող է ստեղծել, քան ներիշխանական խմորումները. «Դրսի ընդդիմությունը հիմա շատ ակտիվորեն զբաղված է դրանով, պարզապես նրանք դա անում են լրատվամիջոցների և քարոզչամիջոցների թիկունքում թաքնված մնալով։ Տեսեք՝ այդ քաղաքական ուժերը ասպարեզում կարծես թե չեն երևում, ընդամենը առանձին պաշտոնյաներ երբեմն ֆեյսբուքյան գրառումներով են հանդես գալիս, կուսակցությունները, որպես այդպիսին, չկան։ Առայժմ առճակատման առաջին գիծ են ուղարկել լրատվամիջոցներին և նպատակ են դրել հասարակության վերաբերմունքը իշխանությունների նկատմամբ այդկերպ փոխել, իջեցնել վարկանիշը։ Հենց զգան, որ իրենց գործունեությունը արդեն բավականաչափ օգուտ տվել է, և իշխանությունների վարկանիշն իջել է, այն ժամանակ կուսակցությունները, որպես քաղաքական մարմիններ, ասպարեզ կիջնեն»։
Ըստ Բաղդասարյանի՝ առայժմ դրսի ուժերից միայն Դաշնակցությունն է, որ կառավարության գործունեության վերաբերյալ հայտարարություններ է տարածում: «Իսկ խորհրդարանի ներսում «Լուսավոր Հայաստանն է», որ շատ հստակ դիրքավորում է իրեն որպես ընդդիմություն, կարծեմ նաև համագործակցության հուշագիր է ստորագրել Դաշնակցության հետ, ինչը, ըստ իս, տարօրինակ է, որովհետև փաստորեն հուշագիր է ստորագրվում մի կուսակցության հետ, որը ինչպես իրենք են ասում՝ իր առջև խնդիր է դրել այս իշխանություններին տուն ուղարկելու։ Ամեն դեպքում ես կարծում եմ, որ քաղաքական ընդդիմադիր հիմնական բևեռը ձևավորվելու է խորհրդարանից դուրս»,- եզրափակեց Բաղդասարյանը։
Սոցիոլոգ Կարեն Սարգսյանի կարծիքով՝ վարչապետ Փաշինյանի մատնանշած սենյակները իրականում ոչ թե 3-ն են, այլ մոտ 30-ը: «Եթե իշխանություն ես ՝ խնդիր ունես։ Նորմալ, ժողովրդավարական ընտրություններով ընտրվել ես, եղել են այլ կուսակցություններ, որոնք այն պահից սկսած, ինչ դու վերցրել ես իշխանությունը, սկսում են քո դեմ աշխատել։ Դա նորմալ գործընթաց է, զարմանալու ոչինչ չկա»,- «Առաջին լրատվական»-ի հետ զրույցում ասաց նա։
Մեր զրուցակիցը հավելեց. ««Իմ քայլը»՝ որպես դաշինք, Նիկոլ Փաշինյանը՝ որպես վարչապետ, և կառավարությունը՝ որպես այդպիսին, ունի կողմնակիցների մեծ զանգված։ Ինձ չի թվում, որ անհանգստանալու ինչ-որ բան կա։ Նորմալ է, որ կան ուժեր, որոնք պայքարելու են այս կառավարության դեմ։ Դու ծրագիր ես ներկայացրել, և այն պետք է իրականացվի։ Նայած թե ինչպես ես իրականացնում, իսկ դա տեղի է ունենում ավելի վատ, քան պլանավորում ես, և պարզ է, որ ինչ-որ բացեր են լինում։ Մարդիկ այդ բացերից օգտվում են, և դա նորմալ է»։
Միևնույն ժամանակ Կարեն Սարգսյանն ընդգծեց. «Անկեղծ ասած՝ չգիտեմ, թե կոնկրետ ինչ երեք սենյակների մասին է խոսքը. իմ հաշվարկներով՝ երեքից զգալիորեն ավելի է։ Երևի վարչապետն ինչ-որ տեղեկություններ ունի կամ պատկերացումն այն է, որ կոնֆլիկտը միայն նախկին իշխանությունների հետ է, բայց դա այդպես չէ։ Կա նույն արևմտամետ ուժերի զանգված, որն իրականությունը շատ ավելի արևմտամետ է ուզում տեսնել։ Կա ռուսամետ զանգված, որը ռուսամետ է ուզում տեսնել, հայամետ ուժեր… և այդպես շարունակ, սոցիալիստական ուղղվածության մարդիկ կան, փոքր և միջին բիզնեսի տեսանկյունից կան տարբեր մոտեցումներ։ Բայց ես միանշանակ կնշեմ՝ իր նշած 3-ից զգալիորեն ավելի է, մոտ 30»։
Լուսանկարը՝ Armeniasputnik-ի
