ԱՄՆ կոնգրեսական Ադամ Շիֆը (դեմոկրատ) և Հանրապետական կուսակցության անդամ Գուս Բիլիրակիսը դիմել են Ներկայացուցիչների պալատի իրենց գործընկերներին՝ կոչ անելով միանալ Հայոց ցեղասպանության ճանաչման վերաբերյալ բանաձևի ներկայացման հարցում:
Երկկուսակցական փաստաթղթի նպատակն է այնպես անել, որ ամերիկյան իշխանությունների քաղաքականությունը հետևի ստորև ներկայացված կետերին.
1. Հայոց ցեղասպանության հերքման մերժում,
2. ԱՄՆ կառավարության կողմից հանցանքի պաշտոնական ճանաչում և ոգեկոչում,
3. ժամանակակից աշխարհում այդպիսի դաժանությունները կանխելու նպատակով Հայոց ցեղասպանության թեմայով ուսուցում կազմակերպելու, հարցի շուրջ հանրային իրազեկման կարևորության գիտակցում:
Բանաձևի հեղինակներն այժմ խնդրում են գործընկերներին միանալ իրենց ու մոտ ապագայում բանաձևը ներկայացնել Ներկայացուցիչների պալատ: Շիֆն ու Բիլիրակիսն ընդգծել են, որ Հայոց ցեղասպանության պաշտոնական ճանաչումը բխում է Միացյալ Նահանգների և երկրի ազգային անվտանգության շահերից։ «Ցեղասպանության պաշտոնական ճանաչումը կօգնի նոր էջ բացել ԱՄՆ-ի արտաքին քաղաքականությունում: Ժամանակն է, որ Միացյալ Նահանգները ոտքի ելնի հանուն ճշմարտության և ընդդեմ Ցեղասպանության հերքման»,-նշել են կոնգրեսականները:
Նրանց նախաձեռնությանն արձագանքել է ԱՄՆ Հայ դատի հանձնախմբի գրասենյակը, որի նախագահ Րաֆֆի Համբարյանը գործադրած ջանքերի համար իր երախտագիտությունն է հայտնել Շիֆին և Բիլիրակիսին:
Ամերիկագետ Սուրեն Սարգսյանը լիահույս չէ, որ բանաձևը կընդունվի։ Նա «Առաջին լրատվական»-ի հետ զրույցում նշեց՝ տարբեր տարիների ընթացքում նման բանաձևեր առաջ են քաշվել տարբեր կոնգրեսականների կողմից՝ տարբեր քաղաքական իրավիճակներ հաշվի առնելով։ «Ըստ իս՝ այս բանաձևը կարժանանա այն նույն ճակատագրին, ինչ նախորդ բոլոր բանաձևերը։ Այսինքն՝ գուցե Կոնգրեսի որոշ օղակներով, հանձնաժողովներով անցնի, բայց դժվար եմ պատկերացնում, որ այն մտնի օրակարգ ու Ներկայացուցիչների պալատում քննարկվի։ Այնպես որ, առանձնապես մեծ հույսեր չունեմ այդ բանաձևի հետ կապված»,- «Առաջին լրատվական»-ի հետ զրույցում ասաց նա։
Սուրեն Սարգսյանն ընդգծեց՝ բանաձևը Կոնգրեսի լիագումար օրակարգ չի ընդգրկվի և ընթացք չի ունենա. «Հարցն իսկապես գտնվում է հայ համայնքի ուշադրության կենտրոնում, բայց սա ինչ-որ տեղ չի տանելու։ Ըստ իս՝ հիմա հաշվի են առել նաև թուրք-ամերիկյան հարաբերությունները, իսկ այդ հարաբերությունները բավականին լարված են։ Իմ կարծիքով՝ հարաբերությունների պատմության ամենացածր մակարդակն է և սա ինչ-որ տեղ հնարավորություն է Թուրքիային պատժելու համար։ Հիմա տարբեր նախագծեր կարող են դրվել շրջանառության մեջ՝ հենց այդ նպատակից ելնելով»։
Մեր զրուցակցի դիտարկմամբ, սակայն, թուրք-ամերիկյան հարաբերությունները որքան էլ լարված լինեն, նման բանաձև չի ընդունվի. «Սկզբում գուցե լարվեն այդ հարաբերությունները, հետո կարգավորվեն, պետությունների հարաբերություններում անընդհատ վայրիվերումներ լինում են։ Այսօր լավ չեն, վաղը կկարգավորվեն։ Եթե նույնիսկ Կոնգրեսն ինչ-որ բանաձև ընդունի, գործադիր մարմնի համար դա նշանակություն չի ունենա»։
Սուրեն Սարգսյանը, ամփոփելով, նշեց, որ չի կարծում, թե Թրամփն արտասանի «Ցեղասպանություն» բառը։
