«Առաջին լրատվական»-ը հյուրընկալել է քաղտեխնոլոգ Կարեն Քոչարյանին և «GALLUP International association»-ի հայաստանյան ներկայացուցչության տնօրեն Արամ Նավասարդյանին՝ քննարկելու համար ներքաղաքական զարգացումները: Եվ հարցին, թե ինչ դիրքերում է այժմ իշխանությունը, քաղտեխնոլոգը պատասխանեց. «Իշխանությունը իր դիրքերում է: Իշխանությունը փորձում է ինչ-որ ռեֆորմներ անել. լավ թե վատ՝ դա այլ խնդիր է: Բայց փորձը ցույց է տալիս, որ շատ արագ հետ են քաշվում»:
Կարեն Քոչարյանը, իր խոսքը հղելով իշխանություններին, նկատեց. «Այլ խնդիր է, որ պետք է քննարկումներ անել տարբեր խմբերի հետ, հետո նոր որոշում կայացնել: Բայց ինչ-որ 20, 40, 100 հոգանոց խմբի բողոքից հետո արդեն կայացրած որոշումից հետ կանգնելը, կարծում եմ, իշխանության թուլության նշան է: Չի՛ կարելի այդպես անել՝ քաղաքական կամք պետք է դրսևորել»:
Քաղտեխնոլոգի խոսքով՝ իր համար ընդունելի է, որ Օպերայի շրջակայքի սրճարանները հանում են. «Որոշել են 3 ամիս առաջ՝ հանում են, իսկ, ասենք, աջ ղեկերը 3 անգամ հետուառաջ են անում, 4 անգամ գազավորված ըմպելիքները… կառավարության որոշում են հանել, հետո ասում են՝ չէ, կարող է վերանայենք»:
Արամ Նավասարդյանն էլ կարծում է, որ իշխանությունները կայացման փուլում են, իսկ ձևավորված թիմն էլ բավականին երիտասարդ է և անփորձ, ուստի իշխանությունները տարբեր որոշումներ կայացնելիս պետք է ականջալուր լինեն էքսպորտային հանրությանը. «Ես շատ վատ տենդենց եմ տեսնում, երբ այս նոր կառավարությունը չի դրսևորում լսելու, հանդիպելու և քննարկելու ունակություն, բայց երբ նկատում են որոշակի հակազդեցություն, նրանք որոշում են ընկրկել՝ «զադնի» են դնում»:
Անդրադառնալով սրճարանների խնդրին՝ Արամ Նավասարդյանը ևս կարծում է, որ Երևանում պետք է ավելացվեն կանաչ գոտիները. «Որոշումը գլոբալ լավն է, բայց իրականացումը շատ թերի է. ինչո՞ւ Երևանի քաղաքապետը չհանդիպեց սեփականատերերի հետ՝ փորձելով կոմպրոմիսային լուծում գտնել: Այն, ինչին ականատես եղանք երեկ, այս իշխանությանը պետք չէր, որովհետև որոշակի խմբի մոտ փոխվում է վերաբերմունքը թե՛ քաղաքային իշխանության, թե՛ կառավարության նկատմամբ»:
Հարցազրույցն ամբողջությամբ՝ տեսանյութում
