«Ինչ որ պետք էր պատասխանվեր Սերժ Սարգսյանի ասածներին՝ պատասխանվեց և ինչ որ պետք էր բաց տեքստով ասվեց»,- «Առաջին լրատվականի» հետ զրույցում, գնահատելով Հայ ազգային կոնգրեսի երեկվա հանրահավաքը, կարծիք հայտնեց հրապարակախոս Հրանտ Տեր-Աբրահամյանը:
Նրա գնահատմամբ՝ ներկա իրավիճակում հանրահավաքում ՀԱԿ-ի կողմից տրված գնահատականներն ու նման պատասխանները սպասելի էին: Տեր-Աբրահամյանը նշեց, որ ըստ էության, երեկվա հանրահավաքում ՀԱԿ-ը վերջնաժամկետ է տվել իշխանություններին մինչև սեպտեմբեր և բաց տեքստով ասել է, որ եթե մինչև սեպտեմբեր բանակցություններ չընթանան արտահերթ ընտրությունների շուրջ, ապա կարգախոսներն ու մեթոդը կփոխվի. «Կարծում եմ՝ շատ նորմալ, տրամաբանական քայլեր են, հաշվի առնելով, որ առաջին երկու ամիսը քաղաքականապես ակտիվ չեն լինում՝ հասկանալի պատճառներով»:
Տեր-Աբրահամյանը նշեց, որ ինքը կողմ է եղել, որ հանրահավաքը սեպտեմբերին անցկացվի, քանի որ համոզված է, որ օգոստոսին հանրահավաք անելն իմաստ չունի. «Օգոստոսին ավելի քիչ մարդ կլինի, բայց դա բնական է, և դրանում խնդիր չկա: Խնդիրը կլինի սեպտեմբերին»:
Հրանտ Տեր-Աբրահամյանը նշեց, որ իր ենթադրություններով, իշխանության կողմից ՀԱԿ-ի առաջարկներին դրական արձագանք չի լինի և սեպտեմբերից նոր փուլ կսկսվի, և հենց այդ ժամանակ կկարևորվի մարդկանց քանակը, իսկ օգոստոսի հանրահավաքին ներկաների թիվն այդքան էլ կարևոր չէ:
