«Վեոլիա ջուր» ՓԲԸ-ն կրկնակի հասույթ է հաշվարկում բաժանորդների նկատմամբ՝ միևնույն սպառման ծավալի դիմաց՝ անվանելով այն «ճշգրտումներ»
Մի քանի օր առաջ հրապարակել էինք “Վեոլիա ջուր” ՓԲԸ պաշտոնական պարզաբանումը՝ անհիմն հասույթի հաշվարկման դեմ բնակչի բողիքին ի պատասխան (հղումը)։
Դրա ուսումնասիրության արդյունքում ունեցանք խոշոր բացահայտում և անմիջապես համապատասխան գրոթյամբ տեղեկացրեցինք ՀՀ վարչապետին։ Ստորև բացահայտման բովանդակությունը:
Կատարելով անտրամաբանական ու ակնհայտ սխալ հաշվարկ, «Վեոլիա ջուր» ՓԲԸ-ն բաժանորդին օդից ծանրաբեռնում է «ճշգրտման» արդյունքում ձևավորվող հասույթով՝ պարտադրելով կատարել վճարումներ։ Սա իրական չարաշահման փաստարկ է՝ հղի կոռուպցիոն մեծ ռիսկերով։ Հաշվի առնելով, որ այս պահին մենք բախվում ենք ոչ թե կոնկրետ բաժանորդի մասով տեղի ունեցած թյուրիմացության, այլ «Վեոլիա ջուր» ՓԲԸ կողմից ներդրված մեթոդաբանության հետ, պետք է նկատի ունենալ, որ տեսականորեն նման «ճշգրտումների» զոհ կարող է դարձած լինել 532 հազար ակտիվ բաժանորդներից յուրաքանչյուրը։
