Հայաստանում և Արցախում այսօր նշում են սպարապետ Վազգեն Սարգսյանի ծննդյան օրը, սպարապետը կդառնար 60 տարեկան: Միջոցառումների անցկացման նպատակով ստեղծված կառավարական հանձնաժողովը ղեկավարում է Հայաստանի վարչապետը:
Վազգեն Սարգսյանի կրտսեր եղբայրը՝ պաշտպանության նախարարի խորհրդական Արմեն Սարգսյանը, «Առաջին լրատվական»- ի հետ զրույցում անդրադառնալով դիտարկմանը, որ Վազգեն Սարգսյանի ծննդյան օրը կհանդիպեն ՀՀ ներկա և նախկին իշխանությունները, նշեց, որ իր համար նախկին և ներկա չկա. «Գոյություն ունեն Վազգեն Սարգսյանին սիրող ընկերներ և բարեկամներ»:
«Եթե Վազգեն Սարգսյանը ողջ լիներ, կարծում եմ հեղափոխության կարիք չէր լինի, երկիրը այլ իրավիճակում կլիներ և չէր լինի ո՛չ Հոկտեմբերի 27, ո՛չ Մարտի 1, և մեր երկիրն ավելի պատվավոր ու ավելի գովելի դիրքերում կլիներ,- նշեց Ա. Սարգսյանը: – Կարծում եմ՝ գլոբալ փոփոխություններն անհրաժեշտ էին, եթե ժամանակին Հոկտեմբերի 27-ը լիարժեք բացահայտվեր, կարող էր Մարտի 1 չլինել, եթե Մարտի 1-ը բացահայտվեր, կարող էր այս թավշյա հեղափոխության կարիքը չլինել, այսինքն՝ մենք կընթանայինք ճիշտ ճանապարհով»:
Ասում են՝ 1998թ իշխանափոխության հարցում վճռորոշ է եղել Վազգեն Սարգսյանի դերակատարությունը: Արմեն Սարգսյանն այս առումով նշեց, որ խորությամբ չի տիրապետում, թե ինչ ճգնաժամ է եղել, քանի որ Վ. Սարգսյանը նման հարցերն ընտանիքի անդամների հետ չի քննարկել, պետության, Կառավարության գործերին ընտանիքի անդամներին չի խառնել: «Խմորումները երբ որ առաջացել էին, և երբ Լևոն Տեր-Պետրոսյան- Վազգեն Սարգսյան ճգնաժամը բերեց իշխանափոխության, Վազգեն Սարգսյանը շատ ծանր էր տանում այդ բաժանումը, որովհետև Լևոն Տեր-Պետրոսյանի հետ ի վերջո բավականին լուրջ, շատ դժվար, փշոտ ճանապարհ էին կտրել և անցել… Անձնական ոչինչ չի եղել, ճամփաբաժանն առաջացել էր Արցախի հարցում»,- նշեց Ա. Սարգսյանը:
Նա նաև հաստատեց, որ եղել է Մեղրին հանձնելու վերաբերյալ նախնական ծրագիր. «Թե ով ինչքան ամակ է ունեցել այդ ծրագրում, Լ. Տեր-Պետրոսյանի ժամանակահատվածից է սկսվել այդ քննարկումը, թե նրանից առաջ, Ռ. Քոչարյանի օրոք է սկսվել, թե հետո, չգիտեմ, բայց գիտեմ, որ Վազգենը, միանշանակ, դրան դեմ է եղել: Նաև Կարեն Դեմիրճյանն է դեմ եղել»:
Մանրամասն՝ տեսանյութում:
