Հեղափոխությունը ստեղծեց նոր իրավիճակ. Սփյուռքում ձևավորվեցին դրական սպասումներ, իշխանությունների նկատմամբ կա վստահության այնպիսի բարձր մակարդակ, որպիսին չի եղել վերջին 20-25 տարիներին, աստիճանաբար բարձրանում է ՀՀ դերը, և կա գիտակցում, որ Հայաստանն է դառնում հայկական աշխարհի կենտրոնը: Այս մասին «Առաջին լրատվական»- ի հետ զրույցում ասաց «Ազգային օրակարգ» կուսակցության համահիմնադիր Վարդան Մարաշլյանը:
Նա նաև հավելեց, որ, այնուամենայնիվ, կան բացասական երևույթներ և մտահոգություններ. «Ինչ-որ ստեղծվել է Սփյուռքում, կարևոր է, բայց դեռևս փխրուն է: Որպեսզի կարողանանք ամրապնդել նոր իրավիճակը, պետք է ձևավորենք արդյունավետ քաղաքականություն Սփյուռքի և Հայաստանի միջև: Վարչապետը, նաև Սփյուռքի նորանշանակ նախարարը ամբիցիոզ, բարձր գաղափարներ էին արտահայտում, խոսում էին այն մասին, որ Սփյուռքը պետք է նոր ազգային գաղափարախոսության մաս կազմի: Արդեն ինն ամիս անցել է, և մենք գործ ունենք գրեթե ամբողջությամբ տարբեր օրակարգի հետ. Կառավարության ծրագրում ընդամենը կես էջ էր նվիրված Սփյուռքի հետ հարաբերություններին:
Վարչապետը խորհրդարանում հնչեցրեց երկու հիմնական խնդիր, առաջինը՝ հայկական ներուժի քարտեզավորման խնդիրն է, երկրորդը՝ մի կառույցի կամ համակարգի ստեղծումը, որ ներկայացնելու է ամբողջ Սփյուռքը և փաստացի լինելու է հիմնական գործընկեր Կառավարության համար՝ Սփյուռք – Հայաստան հարաբերություններում: Վարչապետը, ցավոք, որևէ բառ չասաց հայրենադարձության մասին, և խոսքը Սփյուռքի նախարարության լուծարման մասին էր:
Այս ամենը մտահոգիչ է հատկապես նրանով, որ Սփյուռքի հետ քննարկում տեղի չի ունեցել. այսինքն՝ Հայաստան – Սփյուռք հարաբերությունները դարձել են զուտ Հայաստանի ներքին քաղաքականության մաս: Սփյուռքի նախարարության լուծարման մասին որոշում կայացնելուց առաջ պետք է հայեցակարգ ձևավորվեր Հայաստան – Սփյուռք հարաբերությունների վերաբերյալ, և այն պետք է լայնորեն քննարկվեր սփյուռքյան տարբեր կառույցների, համայնքների հետ, որպեսզի Սփյուռքը դառնար քաղաքականության մշակման պրոցեսի մասնակից: Դրանից հետո հնարավոր կլիներ հասկանալ, թե որն է օպտիմալ լուծումը»:
Անդրադառնալով դիտարկմանը, որ Կառավարության ծրագրում ամրագրված է, որ առաջնահերթություն է համարվում հայրենադարձության խթանումը և կյանքի կոչումը, ինչպես նաև Հայաստանում սփյուռքահայերի ինտեգրման գործընթացին աջակցությունը, Վարդան Մարաշլյանն ընդգծեց, որ շատ լավ կլիներ, եթե լիներ զանգվածային հարենադարձություն, բայց այդ գլոբալ լուծմանը հասնելու համար այլ մոտեցումներ են պետք:
Մանրամասն՝ տեսանյութում:
