Նախօրեին ԱԺ «Ժառանգություն» խմբակցության ղեկավար Ստյոպա Սաֆարյանը հայտարարեց, որ ՀԱԿ-ի և «Ժառանգության» միավորման հարցը վերջնականապես փակված է:
Այսօր խմբակցության պատգամավոր Արմեն Մարտիրոսյանից հետաքրքրվեցինք, թե դա իշխանության և ՀԱԿ-ի հավանական երկխոսությա՞մբ է պայմանավորված, թե՞ արտաքին գործոններով, ինչին ի պատասխան նա ասաց. «Երկխոսությունը հավանական չէ, և մենք դրա ականատեսն ենք: Դրա մասին պաշտոնապես հայտարարվեց ամենաբարձր մակարդակով՝ Կարեն Կարապետյանի շուրթերով, մեկ շաբաթ անց՝ Սերժ Սարգսյանի կողմից:
Ինչ վերաբերում է «Ժառանգության» միավորմանը ՀԱԿ-ին՝ այդ առումով ամբողջովին համաձայն եմ Ստյոպա Սաֆարյանի հետ, քանի որ ժամանակին մենք շատ ճիշտ մարտավարություն ենք ընդունել, և դա ունեցել է օբյեկտիվ հիմք, և չենք անդամակցել ՀԱԿ-ին:
Իսկ ինչ վերաբերում է համագործակցությանը՝ «Ժառանգությունը» բաց է ցանկացած համագործակցության համար: Սակայն մեզ համար առաջնային է լինելու ոչ թե անձը, այլ խնդիրը, և եթե նմանատիպ խնդիր լինի, մենք պատրաստ ենք:
Իսկ արտաքին հարցերի շուրջ ՀԱԿ-ը տարվա սկզբից բոլորովին այլ մարտավարություն ընդունեց, ուստի այս պահին չկա որևէ խնդիր, որ համագործակցենք, բայց եթե որևէ իքս պահի նման խնդիր լինի, մենք բաց ենք համագործակցության համար»:
