Կոռուպցիայի համար 28 տարվա ազատազրկման պատիժ կրող ամերիկյան Դեթրոյթ քաղաքի (Միչիգան) նախկին քաղաքապետ Կվամե Կիլպետրիկի փաստաբանները հարկատուներին արժեցել են ավելի քան 800 հազար դոլար: Նման տվյալներ են պարունակվում դատական փաստաթղթերում՝ հայտնում է ITAR-TASS-ը:
Կիլպետրիկը, ում դեմ դատը սկսվել էր 2012-ի աշնանն ու շարունակվել 5 ամիս, ի վիճակի չի եղել ինքնուրույն վճարել փաստաբանների ծառայությունների համար, և համաձայն ամերիկյան դատական պրակտիկայի՝ փաստաբանները նրան տրամադրվել են անվճար:
Ամենից շատ գումար աշխատել է Ջեյմս Թոմաս անունով պաշտպանը: Նրա ծառայությունների արժեքը կազմել է ժամում 125 դոլար:
Ընդհանուր առմամբ նախկին քաղաքապետի գործով զբաղվել է 5 փաստաբան:
Բացի այդ, հարկատուները ավելի քան 350 հազար դոլար են ծախսել Կիլպետրիկի հոր պաշտպանների վրա: Նրա հայրը մեղավոր է ճանաչվել հարկերի վճարումից խուսափելու մեջ և դատապարտվել 15-ամսյա ազատազրկման:
