Հայաստանցիների 44 տոկոսը համարում է, որ երկրի կառավարման լավագույն ձևը ժողովրդավարությունն է, իսկ ազգային էկոնոմիկայի կարգավորման ամենաարդյունավետ համակարգը՝ շուկայական տնտեսությունը: Այս մասին հաղորդում է «Ազատություն» ռադիոկայանը՝ հղում անելով Վերակառուցման և զարգացման եվրոպական բանկի (ՎԶԵԲ) և Համաշխարհային բանկի (ՀԲ)՝ չորեքշաբթի օրը հրապարակած համատեղ զեկույցի տվյալներին:
«Կյանքն անցման շրջանում» անունը կրող այս հետազոտությունն անցկացվել է Կենտրոնական Եվրոպայի, հետխորհրդային տարածքի 33 պետություններում և Թուրքիայում: Հետազոտության նպատակն է պարզել, թե ինչ ազդեցություն է թողել համաշխարհային տնտեսական ճգնաժամը պետությունների այս խմբի վրա:
Արևմտյան մասնագետները պնդում են, որ Հայաստանի պարագայում ճգնաժամն ազդել է տնային տնտեսությունների 62 տոկոսի վրա: Համեմատության համար՝ Ադրբեջանում այդ ցուցանիշը 55, իսկ Վրաստանում՝ 54 տոկոս է:
Վերլուծաբանները նաև պնդում են, որ Հայաստանում ամենալուրջ խնդիրը փոխադարձ վստահության պակասն է: Եթե 2006 թվականին միմյանց վստահում էր հայաստանցիների շուրջ 30 տոկոսը, ապա այսօր այդ ցուցանիշը գրեթե քառապատիկ անկում է արձանագրել՝ հասնելով 8 տոկոսի: «Հետազոտվող տարածաշրջանում սա ամենացածր ցուցանիշն է», – արձանագրում են զեկույցի հեղինակները:
Նրանք, սակայն, նկատում են, որ պետական հաստատությունների նկատմամբ վստահությունը վերջին տարիներին որոշակիորեն աճել է: Այդուհանդերձ, նախագահին, կառավարությանն ու խորհրդարանին վստահող հայաստանցիների թիվը չի գերազանցում 33 տոկոսը:
Վստահության ամենաբարձր ցուցանիշն ունեն Զինված ուժերը:
Վերջին հարցման համեմատ վստահության ամենամեծ անկումը Հայաստանում արձանագրել է եկեղեցին: «Կրոնական հաստատություններին վստահող հայաստանցիների թիվը նվազել է 40 տոկոսով», – արձանագրում են զեկույցի հեղինակները:
Վերակառուցման և զարգացման եվրոպական բանկի և Համաշխարհային բանկի մասնագետները նաև նկատում են, որ Հայաստանում առավել լուրջ խնդիրներից է շարունակում մնալ կոռուպցիան: Հարցվածների 20 տոկոսը նշել է, որ վերջին մեկ տարում կաշառք է տվել որևէ պետական հաստատությունում, 25 տոկոսը խոստովանել է, որ ստիպված է եղել կաշառել ճանապարհային ոստիկանության աշխատակիցներին: Ընդհանուր առմամբ, հայաստանցիների միայն 20 տոկոսն է կարծում, որ երկրում վերջին չորս տարիների ընթացքում կոռուպցիայի մակարդակը նվազել է, նշված է զեկույցում:
«Հարկ է նշել, որ Հայաստանի բնակչության միայն 22 տոկոսն է բավարարված կյանքի որակով», – նշում են հետազոտության հեղինակները, նկատելով նաև, որ այս ցուցանիշն անկում է արձանագրել սոցիալական գրեթե բոլոր խմբերում՝ բացառությամբ ամենաբարձր եկամուտի տեր մարդկանց:
«Հայաստանցի հարուստների շրջանում կյանքի որակից բավարարված է ամեն երկրորդը», – պնդում են եվրոպացի փորձագետները՝ նաև նշելով, որ հայերը հետխորհրդային տարածքի ամենահոռետես ազգերից մեկն են:
«Հայաստանցիների միայն 33 տոկոսն է կարծում, որ իրենց զավակներին լավ ապագա է սպասում: Լավատեսների քանակը Հայաստանում 2006 թվականից ի վեր նվազել է շուրջ 10 տոկոսով», – փաստում են Վերակառուցման և զարգացման եվրոպական բանկի և Համաշխարհային բանկի համատեղ զեկույցի հեղինակները:
