«Մենք Ստրասբուրգից եկել ենք Հայաստան ու իմացել ենք, որ փաստաթղթի շուրջ բանակցում են Հովիկ Աբրահամյանն ու Էդվարդ Նալբանդյանը, իրենցից էլ կարող եք ճշտել՝ իրենք կո՞ղմ էին փաստաթղթին, թե՞ դեմ»,- այսօր լրագրողների հետ հանդիպմանը Ազգային ժողովում ասաց ՀԱԿ խմբակցության պատգամավոր Նիկոլ Փաշինյանը:
«Ղարաբաղի պաշտպանի դերում հանդես գալու կարիք չկա, գործող իշխանությունը ձախողել է այդ հարցը, այնպես որ՝ Արևմուտքում այդ հարցը կընկալեն այնպես, ինչպիսին այն կա իրականում»,- ընդգծեց նա:
Պատվիրակության ղեկավար, ԱԺ ՀՀԿ խմբակցության պատգամավոր Սամվել Ֆարմանյանն էլ անդրադառնալով Փաշինյանի մեղադրանքներին՝ ասաց. «Մենք մինչև վերջին պահը պատրաստ ենք եղել բանակցել, ես տարօրինակ կհամարեի, որ որպես պատվիրակության ղեկավար՝ անհրաժեշտության դեպքում առաջ եկած խնդիրներն իմ գործընկերների հետ չքննարկեի:
Ես շնորհակալ եմ պարոն Փաշինյանին այն կապակցությամբ, որ նա մեղադրում է, թե մենք Ռուսաստանի մեղադրանքով պատրաստ չենք եղել ստորագրելու: Դա իրականության հետ ոչ մի աղերս չունի: Նա կարող է մեզ այլմոլորակայիններից ուղղորդված լինելու մեղադրանք էլ ներկայացնել, բայց դա իրականության հետ ոչ մի աղերս չունի»:
