Նեապոլ քաղաքում նոր դատական գործընթաց է սկսվում Իտալիայի նախկին վարչապետ Սիլվիո Բեռլուսկոնիի դեմ: Այս անգամ 77-ամյա քաղաքական գործիչը մեղադրվում է 2007 թվականին սենատորներին կաշառելու մեջ՝ այդ ժամանակ Ռոմանո Պրոդիի գլխավորած կառավարության դիրքորոշումը թուլացնելու նպատակով:
Կաշառքը ստացողներից մեկը եղել է սենատոր Սերջո Դե Գրեգորիոն: Նա նույնպես գործով որպես մեղադրյալ է անցնում: 2006-ին ընտրված խորհրդարանում նա ներկայացնում էր «Արժեքների Իտալիա» կուսակցությունը, որը մտել է Պրոդիի հաղթած ձախ կենտրոնամետ կոալիցիայի մեջ: 2007-ի վերջին վճռորոշ քվեարկության արդյունքում Պրոդին կորցրել է մեծամասնության աջակցությունը, ինչը հանգեցրել է կառավարական ճգնաժամի և 2008-ի գարնանը արտահերթ ընտրությունների, որոնց արդյունքներով Բեռլուսկոնին վարչապետ է դարձել:
Ավելի քան 1 տարի առաջ Նեապոլի դատախազությունը հետաքննություն է սկսել կաշառման կասկածների հիման վրա: Ավելի ուշ Դե Գրեգորիոն խոստովանել էր, որ Բեռլուսկոնիից 3 մլն եվրո էր ստացել կոալիցիայից դուրս գալու համար:
Ինչպես պատմել է Պրոդին ITAR-TASS-ի հետ զրույցում, ինքը սենատոր Դե Գրեգորիոյից նամակ է ստացել, որում նա ներողություն է խնդրել և խոստովանել, որ կաշառվել է:
Դե Գրեգորիոյի փաստաբանները իրենց պաշտպանյալի համար փորձում են հասնել դատարանի հետ համաձայնության և 1.8 տարվա ազատազրկման տեսքով բավականին մեղմ պատժի:
