Ընտրություններն ավարտվեցին, իշխանությունը ձևավորման շեմին է. փակե՞լ հեղափոխության էջը. «Առաջին լրատվական»- ի հետ զրույցում անդրադառնալով այս հարցին՝ քաղաքագետ Արկադի Վարդանյանն ընդգծեց, որ իր կարծիքով՝ հեղափոխության էջը նոր պետք է բացվի:
«Հեղափոխության նախաբանից անմիջապես հետո պետք է կատարվեր այդ էջերի համարակալումը, ինչը ժամանակին չարվեց: Ինձ զարմացնում և փոքր-ինչ նաև մտահոգում է այն, որ 30 տարիների ընթացքում ժողովրդի ճնշող մեծամասնության գիտակցության և ենթագիտակցության մեջ արմատավորվել են այնպիսի կրիչներ, որոնք նաև ուղեկցում են մարդկանց հիշողությունները, այսօրվա նկատմամբ տրամադրությունները:
ՀՀ երկրորդ նախագահ Ռոբերտ Քոչարյան կամ ՀՀ երրորդ նախագահ Սերժ Սարգսյան. այս բառակապակցություններն ինձ համար անընդունելի են, որովհետև նրանցից ոչ մեկը ՀՀ նախագահ չի եղել, և եթե առաջնորդվենք այն մտքով, որ ճշմարտությունը բացահայտելու համար առաջին հերթին պետք է իրերը կոչել իրենց անուններով, ապա պետք է ուղղակիորեն ասենք, որ այդ երկու անձնավորությունները հեյդարալիևյան-բոլշևիկյան դպրոցի շրջանավարտներ են, որոնք բազում հանգամանքների բերումով հայտնվել են սկզբում Արցախի իշխանության գլխին, իսկ հետո տեղափոխվել են Հայաստան: Հանգամանքներ ասելով՝ նկատի ունեմ շատ հարցեր, որոնք դեռ բացահայտման կարիք ունեն, բայց վաղաժամկետ եմ համարում այդ հարցերի մասին խոսելը, չեմ ուզում դուրս գալ մեր ներքին քաղաքական խոհանոցի սահմաններից և ներխուժել արտաքին աշխարհ: Մի գեղեցիկ օր այդ մասին կխոսենք:
Անցյալը շատ խորն է արմատավորված: Պետք է ոչ թե մոռանալ անցյալը, այլ պետք է շատ լավ հիշեշել և դասեր քաղել: Երեկվա օրը վերջացնելու և փակելու համար, հարկավոր է այդ էջը մինչև վերջ կարդալ և ոչ թե ձևացնել, թե չենք տեսնում՝ ինչ է գրված»:
«Արդարադատությունը մեզ անհրաժեշտ է օդ ու ջրի պես. շատ մեծ և առաջնահերթ խնդիր է արդարության հանդեպ հավատ արթնացնելը»,- նշեց քաղաքագետը:
Մանրամասն՝ տեսանյութում:
