«Մենք այնքան անմեղ զոհեր ենք ունեցել տարբեր արհավիրքներից, որ մեր ազգի յուրաքանչյուր ներկայացուցիչ պետք է մի քանի մարդու փոխարեն ապրի. եթե մի գիրք պիտի կարդայիր, երկուսն էլ նրանց փոխարեն պիտի կարդաս, ովքեր չկան, եթե մի երեխա պիտի ունենայիր, որ քեզ փոխարիներ աշխարհում, մեկն էլ նրանց փոխարեն պիտի ունենաս. մեր ազգը առաքելություն ունեցող ազգ է և Հայաստանը առաքելություն ունեցող պետություն է,- այս մասին «Առաջին լրատվական»- ի հետ զրույցում ասաց «Լուսավոր Հայաստան» կուսակցության նախագահ Էդմոն Մարուքյանը՝ հավելելով, որ հարգանքի տուրք պետք է մատուցել զոհերի հիշատակին, բայց նաև ամեն ինչ պետք է անել, որ արհավիրքը չկրկնվի. «Օրինակ՝ ամեն ինչ պետք է անել, որ շինարարությունը Հայաստանում ամուր լինի, որովհետև երկրաշարժի ավերածությունը նաև շենքերի կառուցման ժամանակ կատարված թալանի հետևանք է»:
ԼՀԿ պատգամավորության թեկնածու Մանե Թանդիլյանը հավելեց, որ նորանկախ Հայաստանի համար ամոթալի էջ է 30 տարի անց երկրաշարժի հետևանքով անօթևան մնացած մարդկանց բնակարան չունենալու խնդրի առկայությունը: Նա նաև հավաստիացրեց, որ «Լուսավոր Հայաստան»- ը տեսնում է եկամտի այն աղբյուրը, որի միջոցով կարող է լուծվել անօթևան ընտանիքներին բնակարանով ապահովելու հարցը:
«Մայրս այդ կողմերից է, հիշում եմ՝ արհավիրքի օրերին ինչ ապրումների ու զգացողությունների միջով ենք անցել, և իմ ծնողներն ինչպիսի մասնակցություն են ունեցել վերականգնման աշխատանքներին, նրանք այդ օրերին աղետի գոտում էին, մեզ համար դա ապրված իրականություն է»,- նշեց ԼՀԿ պատգամավորության թեկնածու Արման Բաբաջանյանը:
Դեկտեմբերի 7-ը նաև նախընտրական քարոզչության վերջին օրն էր: Էդմոն Մարուքյանը նշեց, որ եթե «Լուսավոր Հայաստանը» չմասնակցեր ընտրություններին, արդյունքներն ավելի կանխատեսելի կլինեին: Նրա խոսքով՝ «Լուսավոր Հայաստանը», մասնակցելով խորհրդարանական ընտրություններին, խառնել է շատ խաղաքարտեր: «Լուսավոր Հայաստանի» համար պատմական ժամանակաշրջան է: Ես հասկացա, որ երկրորդ տեղի համար մեր պայքարը դարձել է հրամայական, մարդիկ են այդ մասին պահանջում»,- նշեց Է. Մարուքյանը՝ նաև ընդգծելով, որ հեղափոխությունից հետո երկրորդ ուժ դառնալն, ըստ էության, առաջին տեղն է:
Ա. Բաբաջանյանի հավաստմամբ՝ քարոզարշավի ընթացքում պարզ է դարձել, որ «Լուսավոր Հայաստան»-ին աջակցում են հասարակության ավելի լայն շերտեր, քան կանախատեսվում էր՝ հույս ունենալով խորհրդարանում տեսնել որպես երկրորդ քաղաքական ուժ: ««Լուսավոր Հայաստան»- ը հեղափոխական ալիքից շատ մեծ հարվածներ է ստացել, բայց այս ընտրությունները կուսակցությունը վերագործարկելու լավ հնարավորություն է: Մեր ներկայությունը ԱԺ-ում, որպես ընդդիմություն, մեծապես պետք է պետությանը, և՛ կլինի ի նպաստ այս փոփոխությունների»:
Քննարկման մասնակից ԼՀԿ պատգամավորության թեկնածուների կանխատեսմամբ՝ ՀՀԿ-ն ընտրությունների հաջորդ օրը կլինի արտախորհրդարանական ուժ:
Մանրամասն՝ տեսանյութում:
