ԱՄՆ-ը որևէ բեկում չի ակնկալում «Ժնև-2» համաժողովին, որը կոչված է Սիրիայում քաղաքական կարգավորման գործընթաց սկսել: Այս մասին հայտարարել է Պետդեպի մամլո ծառայության ղեկավարի տեղակալ Մարի Հարֆը:
«Ոչ ոք չի ակնկալում, որ բոլոր հարցերը կլուծվեն հաջորդական 24-48 ժամվա ընթացքում: Այնուհանդերձ, մենք իսկապես կարծում ենք, որ առկա է բարենպաստ հնարավորություն՝ հասնելու առաջընթացի «Ժնև-1»-ի կոմյունիկեի լիարժեք կատարման համար»,- հայտարարել է Հարֆը՝ փոխանցում է ITAR-TASS-ը:
Հարֆի կարծիքով՝ Իրանի հրավերը համաժողովին իմաստ չունի: Վաշինգտոնը կարծում է, որ Թեհրանը, ի տարբերություն հանդիպման մյուս մասնակիցների, հակված չէ Դամասկոսում անցումային կառավարություն ձևավորելու գաղափարին:
ԱՄՆ Պետդեպի ներկայացուցիչը նաև վճռականորեն դատապարտել է Բաշար Ասադի կառավարությանը, որը, ինչպես ասվում է Կատարի աջակցությամբ պատրաստված նոր զեկույցում, պարբերաբար դիմում է կտտանքների և արտադատական վրեժխնդրությունների: ԱՄՆ-ի տեսանկյունից՝ խոսքը «լայնորեն տարածված և, ակնհայտորեն, ռեժիմի կողմից մարդու իրավունքների պարբերական խախտումների մասին է»՝ ընդգծել է Հարֆը:
«Ինչպես մենք արդեն ասել ենք,- հավելել է նա,- սիրիական ռեժիմը պատասխանատվություն է կրում ռազմական հանցագործությունների և մարդկության դեմ հանցագործությունների համար»:
