Հայաստանը կարող է հանգուցային լինել եվրոպական բիզնես հանրության և ՄՄ շուկայի միջև: «Առաջին լրատվական»-ի հետ զրույցում այս մասին ասաց Հայ-բելգիական առևտրի պալատի նախագահ Վալերի Սաֆարյանը՝ ներկայացնելով եվրոպական բիզնես հանրության տրամադրությունները ՀՀ նախագահ Սերժ Սարգսյանի սեպտեմբերի 3-ի որոշումից հետո և Հայաստանի նոր դերակատարությունը ՄՄ-ում:
Անդրադառնալով Վիլնյուսյան ԱլԳ երրորդ գագաթնաժողովի տապալմանը՝ նա ասաց, որ Բելգիայի և ընդհանրապես Եվրոպայի բիզնես հանրությունն ավելի իրատես է, քան եվրոպական քաղաքական գործիչները, ուստի Վիլնյուսյան տապալման համար Եվրոպայի ղեկավարության պատասխանատվության մեծ բաժին է տեսնում: Ըստ նրա՝ առաջին հերթին Եվրոպայի ղեկավարները չպետք է փորձեին դերակատարություն ունենալ Ռուսաստանի ազդեցության գոտում՝ առանց ՌԴ-ԵՄ հարաբերությունների հստակ շրջանակի: Եվ երկրորդ՝ նրա խոսքով, Եվրոպան պետք է զարգացնի ազգային համատեքստի ընկալումը:
«Հայաստանն ու Ուկրաինան երկու հիանալի օրինակներ են, թե ինչպիսի սխալ հաշվարկով առաջնորդվեց Եվրոպան տարածաշրջանում Ռուսաստանի կապերի վերաբերյալ: Հայաստանը կախյալ է Ռուսաստանից անվտանգությամբ, իսկ Ուկրաինային անհրաժեշտ է ռուսական գազ՝ իր արդյունաբերության համար: Ի՞նչ արեցին ԵՄ պաշտոնյաները հայ-թուրքական սահմանի բացման ուղղությամբ: Լիահույս լինենք, որ մայիսին եվրոպական ընտրություններից հետո նոր հանձնաժողովը կսկսի գործը ՌԴ-ի հետ հստակ և բաց երկխոսության մթնոլորտում այնպես, որ յուրաքանչյուր եվրոպական նախաձեռնություն չի դիտվի որպես ՌԴ շահերի դեմ քայլ»,- նման տեսակետ հայտնեց Վալերի Սաֆարյանը:
Ինչ վերաբերում է հայ-եվրոպական բիզնես կապերին, նրա համոզմամբ, տրենդերը նույնը կմնան, բայց հույս կա, որ ֆիգուրները կփոխվեն:
Վալերի Սաֆարյանը նշեց, որ Վրաստանը կշարունակի ավելի շատ եվրոպական ներդրողների գրավել, քան Հայաստանն իր ԽՀԱԱԳ նախաստորագրման և պրոեվրոպական քաղաքականության շնորհիվ:
«Բայց Հայաստանը բաց կմնա ռուսական շուկայի և ՄՄ անդամ երկրների համար: Որքան Հայաստանը շարունակի ժողովրդավարացնել իր ինստիտուտները, և քաղաքական համակարգը կլինի ամենաանվտանգ և ապահով ճանապարհը եվրոպական բիզնեսի համար ՄՄ շուկա մուտքի ուղղությամբ: ՄՄ առևտրային գործիչները շատ հզոր կլինեն, և Հայաստանը կարող է շահել դրանից, եթե դիտարկվի որպես տարածաշրջանային հանգույց եվրոպական ընկերությունների համար: Ուստի Հայաստանը պետք է զարգացնի իր շուկայական դիրքն այս ուղղությամբ:
Ապահով և հեշտ կյանքի ռազմավարությունը միակ կենսունակ ուղին է, եթե Հայաստանը շարունակի նոր գործընկերություն փնտրել ԵՄ-ի, ՆԱՏՕ-ի հետ հավասարակշռելու Ռուսաստանի մեծ ձեռքն իր տնտեսության վրա: Հայաստանը դեռ տառապում է մրցակցության բացակայությամբ և չունի կապիտալ ռեսուրսների դիվերսիֆիկացիա: Դրանք շատ կարևոր, առանցքային կետեր են եվրոպական առևտրային գործընկերների համար: Հայաստանը շնորհակալ է բազմաթիվ քաղաքական բարեփոխումների համար, որոնք վերջին 10 տարվա ընթացքում իրականացվել են, ուստի այդ բաց շուկայական մակարդակը պետք է պահպանվի և ազդի ՄՄ մյուս անդամների վրա, ոչ թե Հայաստանը հակառակ զարգացումն ապրի:
ՌԴ-ն, Ղազախստանն ու Բելառուսը չեն կարող դիտարկվել որպես բաց և մաքուր տնտեսություն ունեցող երկրների օրինակներ: Շատ ճշգրտումներ մարտահրավեր կլինեն Հայաստանի և ՄՄ-ի համար առաջիկա ամիսներին: Հուսանք, որ Հայաստանը մեծ դերակատարություն կունենա այդ միությունում»,- պարզաբանեց Վալերի Սաֆարյանը:
