Վաղը տրանսպորտի, կապի և տեղեկատվական տեխնոլոգիաների նախարարությունը պետք է հանդես գա հայտարարությամբ, որտեղ պետք է նշվի աջ ղեկով մեքենաների մաքսազերծման արգելքի հետ կապված խնդիրը։
Հիշեցնենք, որ մոտ մեկ ամիս է՝ Բագրատաշենի մաքսակետում աջ ղեկով մեքենաների կուտակում է։ Այդ մեքենաների մաքսազերծում չի կատարվում, քանի որ հոկտեմբերի 1-ից արգելվում է աջ ղեկով մեքենաների ներկրումը։
Թեև տրանսպորտի նախարարությունը դեռ չի որոշել, թե ինչ լուծում է տրվելու խնդրին, սակայն, մեզ հասած տեղեկություններով՝ որոշումը լինելու է «Ղեկն աջ» նախաձեռնության առաջարկներից մեկը։ Իսկ նախաձեռնության անդամներ ցանկանում են սահմանային անցակետում մեքենայի ղեկը վերասարքավորել ձախ, այդպես ներկրել Հայաստան, ստանալ պետական գրանցում, այսինքն` կատարել մաքսազերծում, այնուհետև ստանալ թույլտվություն, որպեսզի մեքենան վերասարքավորվի աջ ղեկային տեղաբաշխմամբ։
Ըստ էության հենց այս տարբերակն էլ կընտրվի, որին, սակայն, դեմ է ոստիկանությունը։ Մեզ հասած տեղեկություններով՝ նախարարությունը ոստիկանությունից հարցում է կատարել լուծման այս տարբերակի մասով, ոստիկանությունը սկզբունքորեն դեմ է եղել դրան, բայց հաշվի առնելով ստեղծված վիճակը, հնարավոր է՝ բացառություն արվի։ Իսկ բացառությունը վերաբերելու է միայն Բագրատաշենի մաքսակետում կուտակված մեքենաներին։ Այս տարբերակի ընտրության դեպքում ձախ ղեկի անվան տակ մաքսազերծված աջ ղեկով մեքենաների «վինկոդերը» ֆիքսվելու են ոստիկանությունում, որպեսզի սահմանված ժամկետում կատարվի ղեկի փոփոխություն։
Նշենք, որ, ըստ էության, այս տարբերակն էլ չի գոհացնելու ավտոներկրողներին, քանի որ խնդիրը վերաբերում է ոչ միայն սահմանային անցակետում կուտակված մեքենաներին։ Ըստ «Ղեկը աջ» նախաձեռնության անդամների պնդումների՝ իրենք մոտ 3000 մեքենայի պատվեր են կատարել, իսկ այդ մեքենաները դեռ ճանապարհին են և դրանք տեղ հասնելուն պես, չի բացառվում, որ անցակետում առաջանա նույն իրավիճակը։
Ամեն դեպքում, կընտրվի այս տարբերակը, թե մեկ ուրիշ, անհրաժեշտ է կառավարության առնվազն երկու որոշման փոփոխություն։ Այս կոնտեքստում կառավարության վաղվա նիստում չկա կառավարության որևէ որոշման մեծ փոփոխություն անելու նախագիծ։ Դա, թերևս, կտեղափոխվի հաջորդ շաբաթ։
Խնդրի հետ կապված մենք փորձեցինք մեկնաբանություն ստանալ տրանսպորտի նախարարությունից, որտեղից մեզ փոխանցեցին, որ քննարկումները շարունակվում են և շարունակվելու են նաև վաղը, մինչև վերջնական որոշում կայացնելն ու հայտարարությամբ հանդես գալու պահը։ «Հետևաբար այս պահին որևէ հստակ բան ասել չեմ կարող»,- «Առաջին լրատվական»-ին ասաց փոխնախարար Արմեն Բաբուխանյանը։
Հիշեցնենք, որ Փամբուխչյանը հոկտեմբերի 30-ին ընդունել էր «Ղեկը աջ» նախաձեռնության ներկայացուցիչներին։ Հանդիպմանը մասնակցել էին նաև աջակողմյան ղեկային տեղաբաշխմամբ ավտոմեքենաների ներմուծման արգելքի հետ առնչվող գերատեսչությունների պատասխանատուներ, որի ժամանակ ևս քննարկվել էր հարցն ու շահագրգիռ կողմերին առաջարկվել քննարկել ու առաջարկել խնդրի լուծման երեք տարբերակ։
Նշենք, որ նախարարության մոտեցումը նախաձեռնության անդամների կողմից բարձրացվող հարցի հետ կապված՝ ամբողջությամբ չեղարկել աջ ղեկով մեքենաների ներկրելու արգելքը, վերջնական է, օրենքը չի չեղարկվելու։
