Նիկոլ Փաշինյանն Ազգային ժողովում ելույթ ունեցավ, և այդ ելույթը կարողացավ հիացնել ամբողջ հասարակությանը․ նա կետ առ կետ կանգ առավ մի շարք խնդիրների վրա, պարզաբանումներ տվեց բոլոր այն հարցերին, որոնք քննարկվում ու շահարկվում են վերջին ամիսների ընթացքում։
Մասնավորապես, նա հետաքրքիր կերպ մեկնաբանեց հեղափոխություն և իշխանափոխություն խնդիրը, որն անընդհատ քննարկվում է․ դա այլընտրանքային պատասխան էր՝ նա ասաց, որ եղել է հեղափոխություն, բայց դեռ չի եղել իշխանափոխություն։ Ինչպե՞ս կմեկնաբանեք Նիկոլ Փաշինյանի ասածը «Առաջին լրատվական»-ի հարցին քաղաքական վերլուծաբան, քաղաքագետ Էդգար Վարդանյանը պատասխանեց․ «Ընդհանրապես Նիկոլ Փաշինյանը սիրում է օրիգինալ մտքեր արտահայտել, բայց տեղին, և այս արտահայտությունը նույնպես կարելի է այդ օրինակներից մեկը համարել։
Գիտեք՝ բանն այն է, որ երբ խոսում ենք հեղափոխության մասին, մենք պետք է հղում անենք հեղափոխության տարբեր տեսություններին և պարզենք՝ կա ինչ-որ ընդհանուր բան այդ բոլոր տեսություններում, և այն, ինչ-որ մեր մոտ տեղի է ունեցել, բաղդատենք տարբեր մասերի և տեսնենք՝ այդ մասերը առկա են այդ տեսություններում»։
«Նիկոլ Փաշինյանը երբ ասում է, որ եղել է հեղափոխություն, նա նկատի ունի, որ հիմնարար խաղի կանոնները քաղաքական դաշտում փոխվել են՝ ռադիկալ կերպով են փոխվել։ Շատերը հղում են անում հեղափոխության միայն մարքսիստական տեսությանը և ասում են, որ ֆեոդալիզմից կապիտալիզմի կամ կապիտալիզմից սոցիալիզմի անցում չի եղել, ուրեմն ո՞ւր է այստեղ հեղափոխություն։ Սա շատ նեղ, սահմանափակ մեկնաբանություն է, և իրականում հեղափոխության տեսությունները, ինչպես նշեցի, տարբեր են»,- հավելեց քաղաքագետը։
Ամբողջությամբ՝ տեսանյութում։
