«Շատ ողջունելի է, որ առաջին անգամ իրեն «երրորդ ուժ» հռչակած ԲՀԿ-ն փորձ է կատարում իր կարծիքը հայտնել: Մինչև հիմա ինչքան էլ իրեն «ոսկե միջինը» համարող «Բարգավաճ Հայաստանն» ընդդիմադիր կուսակցություն էր ուզում երևալ, բայց պարզ երևում էր, որ դա այդպես չէ»,- «Առաջին լրատվական»-ի հետ զրույցում ասաց քաղաքագետ Գագիկ Համբարյանը՝ անդրադառնալով հունվարի 18-ին 4 ոչ իշխանական ուժերի անցկացնելիք համատեղ հանրահավաքին:
Նրա խոսքերով՝ հիմա էլ չի կարելի ասել, որ ԲՀԿ-ն ընդդիմադիր է, որովհետև մեկ հանրահավաքով «ընդդիմադիր» անվանելը բավականին բարդ է․ «Ըստ իս՝ այն, որ խորհրդարանում երկրորդ մեծության կուսակցությունը մասնակցում է ընդդիմության կողմից կազմակերպված միտինգին՝ դա ողջունելի է: Նույնը կարող եմ ասել ավելի փոքր ֆրակցիա ունեցող Դաշնակցության մասին, որը վերջերս փորձ կատարեց նորից կոալիցիա մտնել՝ ի դեմս Վահան Հովհաննիսյանի դեսպան նշանակվելուն, որովհետև այդ պաշտոնը Վ․ Հովհաննիսյանին հենց այնպես չէին տա»:
Քաղաքագետի դիտարկմամբ՝ երկրորդ նախագահ Ռոբերտ Քոչարյանի հարցազրույցը՝ կուտակային համակարգի մասով, խթան է, որպեսզի Հայաստանում այդ համակարգի ներդրմանը դեմ ուժերն իրենց ձեռքերում ունենան բավական խոշոր խաղաքարտեր: Եվ դա, նրա խոսքով, չնայած այն բանին, որ Քոչարյանն ունի իրեն կաշկանդող խնդիր՝ Մարտի մեկ:
Այս 4 կուսակցությունների դուրս գալը Ազգային ժողովից հրապարակ, ըստ Համբարյանի, ևս պետք է զգոնացնի գործող իշխանություններին, որովհետև դա կարող է ավելի ծանր հետևանքներ ունենալ ՀՀԿ-ի համար. «Ազգային ժողովի խոսափողն օգտագործող քաղաքական ուժերը հասկանում են, որ գործող իշխանությունն իրենց կարծիքը բացարձակ չի հարցնում: Անհնար է, որ ընդդիմությունը լիովին վատ գաղափարներով հանդես գա, և անհնար է, որ իշխանությունը միշտ լավ որոշումներ ընդունի»:
Մեր զրուցակիցն ավելացրեց, որ այս միավորումը ողջունելի է, որովհետև ինչքան էլ այսպիսի հնարավորություն ընդդիմությունն ունեցել է՝ չի միավորվել․ «Իսկ չի միավորվել, որովհետև չէր ուզում ԲՀԿ-ն, նաև՝ ՀՅԴ-ն: Հիմա կարելի է ասել, որ սա փորձ է կուսակցությունների կողմից՝ վերականգնելու իրենց դիրքերը, որովհետև պայքարն իրենց ձեռքը վերցրել էին հիմնականում հասարակական կազմակերպությունները»:
Ազատամարտիկ Սուրեն Սարգսյանը ևս անդրադարձավ այդ հավաքին՝ նշելով որ իրենք վերապահումով ողջունում են այդ գաղափարը․ «Մենք գտնում ենք, որ Սերժ Սարգսյանի ռեժիմին սպասարկող՝ ՍԴ նախագահ Գագիկ Հարությունյանը ի նպաստ ժողովրդի որոշում կայացնել չի կարող, իսկ նրանք հավաքվում են, որպեսզի նաև այդ հարցը քննարկեն»:
Լուսանկարը՝ Ֆոտոլուր-ի
