ԱՄՆ դեսպան Ռիչարդ Միլզի առաքելությունը Հայաստանում ավարտվել է, արդեն հայտնի է, թե ով է Հայաստանում ԱՄՆ նոր դեսպան նշանակվել: «Առաջին լրատվական»- ի հետ զրույցում միջազգայնագետ Սուրեն Սարգսյանը նշեց, որ Միլզը բավականին ակտիվ և էֆեկտիվ դեսպան էր, նրա գործունեության ժամկետը ավելի վաղ էր ավարտվել, բայց Հայաստնում տեղի ունեցող իրադարձությունների պատճառով Վաշինգտոնը որոշում էր կայացրել երկարաձգել նրա պաշտոնավարման ժամանակը: «Միլզը ակիվորեն աշխատել է բոլոր ուղղություններով և ունեցել ձեռքբերումներ: Նոր նշանակված դեսպան Լինն Թրեյսին ևս պրոֆեսիոնալ դիվանագետ է, բարձր են գնահատվում նրա ոչ միայն մասնագիտական, այլ նաև մարդկային գծերը»,- նշեց Ս. Սարգսյանը:
Միջազգայնագետը կարծիք հայտնեց, որ Հայաստանը Սիրիա հումանիտար առաքելություն ուղարկելու հարցը պետք է քննարկի նաև Վաշինգտոնի հետ. «Պետք է առաջին հերթին բաց և թափանցիկ աշխատենք մեր ամերիկացի գործընկերների հետ, նրանց տեղեկացնենք մեր նպատակները՝ ինչի համար ենք գնում Սիրիա, ինչքան ժամանակով, ինչ խնդիրներ ունենք մեր առջև դրված: Մեր արտաքին քաղաքականությունն ընդհանրապես պետք է թափանցիկ լինի: Միջազգային հարաբերությունները կառուցվում են վստահության գործոնի հիման վրա»:
Ս. Սարգսյանի դիտարկմամբ՝ ԱՄՆ-ի վարչակազմն ընկալում է, որ ծով չունեցող Հայաստանը Իրանի և Վրաստանի հետ բարիդրացիական հարաբերություններին այլընտրանք չունի. «Նրանք շարունակելու են մեզ հետ շփվել առանց երկընտրանքի առաջ կանգնեցնելու, այսինքն՝ չեն ասելու Իրանի հետ հարաբերությունները դադարեցրեք, այլապես պատժամիջոցներ կկիրառվեն»:
Միջազգայնագետի կարծիքով՝ հայ-ամերիկյան օրակարգում մեծ նշանակություն պետք է սկսի ունենալ ռազմական համագործակցությունը:
Նրա խոսքով՝ Մինսկի խմբում նոր գաղափարներ լինում են, այն դեռ իրեն չի սպառել և օգնում է կողմերին, կսպառվի այն ժամանակ, երբ բանակցային գործընթաց չլինի և պատերազմ սկսվի:
Առաջիկա օրերին Հայաստան կայցելի ԱՄՆ-ի նախագահի ազգային անվտանգության հարցերով խորհրդական Ջոն Բոլթոնը: Ս. Սարգսյանի կարծիքով՝ Հայաստանի համար ավելի կարևոր ու էֆեկտիվ կլինի աշխատել ոչ թե Թրամփի, այլ Ջոն Բոլթոնի հետ: «Սա մեզ համար հնարավորություն է, որպեսզի ուղիղ կապ հաստատենք ԱՄՆ վարչակազմի հետ: Սա հնարավորություն է ազդել Թրամփի վրա, աշխատանքային կարգով կարելի է շատ արագ խնդիրներ լուծել, ներկայացնել խնդիրներ և այլն:
Ս. Սարգսյանի կարծիքով՝ Իսրայելի հետ Հայաստանի հարաբերությունները նույնպես պետք է դիտարկնել նաև հայ-ամերիկյան հարաբերությունների համատեքստում:
Մանրամասն՝ տեսանյութում:
