«2019թ-ի այս բյուջեով սոցիալ-տնտեսական առաջնահերթ խնդիրները չեն լուծվելու, այսինքն այն ակնկալիքները, որոնք կան՝ աշխատավարձերի ու կենսաթոշակների բարձրացում, այս բյուջեի շրջանակներում այդ հարցերը չի լուծվելու։ Նախագծում ներկայացված թվերը անցյալ տարվա բյուջեում ներկայացված թվերի կրկնությունն են։
Նախորդ կառավարությունը դա հիմնավորում էր այսպես, որ Հայաստանի տնտեսությունը հայտնվել է մի այնպիսի իրավիճակում, որ օրակարգային հարց է դարձել պետական պարտքի սպասարկումը, իսկ պետական պարտքի սպասարկումը նշանակում է, որ, եթե ավելանում են ընթացիկ ծախսերը, ապա զարգացման հնարավորությունն է պակասում։ Հիմա 2019թ-ի բյուջեն էլ այս շրջանակներում է կազմվել, ինչը ինձ համար շատ հասկանալի և ընդունելի է, այդպես էլ պետք է լիներ»,-«Առաջին լրատվական»-ի հետ զրույցում ընդգծեց տնտեսագետ Վահագն Խաչատրյանը՝ անդրադառնալով կառավարության կողմից հավանության արժանացած 2019թ-ի բյուջեի նախագծին։
Տնտեսագետը կիսում է ՀՀ վարչապետ Նիկոլ Փաշինյանի այն գնահատականը, որ այս բյուջեն իներցիոն է, «նախկին կառավարության բյուջեի ուրվականն է» և հընթացս փոփոխությունների պետք է ենթարկվի։
«Ինձ ամենաշատը հետաքրքրում է, թե ինչ մոտեցումների շրջանակներում է այս բյուջեն կազմվելու, այսինքն էլի շարունակելո՞ւ ենք սահմանափակումը կապիտալ և ընթացիկ ծախսերի, թե՞ ոչ․ շատ կցանկանայի, որ ԱԺ-ում բյուջեի քննարկման ժամանակ այս մոտեցումները ճշտվեր, հստակեցվեր, որից հետո նոր կարող ենք որոշ հարցերի պատասխաններ հստակ գտնել։ Բայց ընդհանուր առմամբ՝ համաձայն եմ վարչապետի այդ դիտարկման հետ, որ նախորդ կառավարության բյուջեի շարունակությունն է սա և իսկապես պետք է փոփոխությունների ենթարկվի»,-նշեց Վահագն Խաչատրյանը։
Մանրամասները՝ տեսանյութում։
