Հոկտեմբերի 25-ից նոյեմբերի 7-ը Նորվեգիայում կանցկացվեն ՆԱՏՕ-ի «Միացյալ եռաժանի -2018» (Trident Juncture 2018), ռազմավարական զորավարժությունները, հաղորդում է ABC News-ը: Մասնակցելու են զինված ուժերի բոլոր տիպերը՝ 45 հազար զինվորական, 10 հազար տրանսպորտային միջոց, 150 ինքնաթիռ և 31 երկրի 60 նավ:
Զորավարժություններին կմասնակցեն ինչպես դաշինքի անդամ երկրները, այնպես էլ նրա գործընկերները՝ Ֆինլանդիան և Շվեդիան: Վերջին 16 տարիների ընթացքում սա ՆԱՏՕ-ի կազմակերպած ամենամեծ զորավարժությունն է:
«Միացյալ եռաժանի -2018»-ը դաշինքի երկրներից մեկի վրա կեղծ հարձակումն է: Փորձագետների կարծիքով՝ դա առաջին հերթին ազդանշան է Ռուսաստանի համար: Արևմուտքի երկրները փորձում են Մոսկվային համոզել, որ ՆԱՏՕ-ն պաշտպանական դաշինք է, որը պաշտպանում է իր սեփականությունը, ուստի անիմաստ է հարձակվել դաշինքում գտնվող որևէ երկրի վրա։ Ռուսական ագրեսիայից առավելապես զգուշանում են Բալթյան փոքր երկրները`Լիտվան, Լատվիան և Էստոնիան:
Բացի այդ, Եվրոպայի հյուսիսում լայնամասշտաբ զորավարժություններ սկսելով ՆԱՏՕ-ն ակնարկում է Կրեմլին, որ չի հանդուրժի Արկտիկայի բնական ռեսուրսների յուրացումը: ABC News-ին տված հարցազրույցում, ԱՄՆ-ի ռազմածովային նավատորմի հրամանատար Ջեյմս Ֆոգոն, հայտարարել է, որ սառը պատերազմի ավարտից հետո Ռուսաստանը կորցրել է ծովում ունեցած իր երբեմնի ուժը: Միակ լուրջ վտանգը նրա մարտական սուզանավերի նավատորմն է:Ներկայումս Ռուսաստանը Սև ծովում և Արևելյան Միջերկրածովյան տարածաշրջանում ունի վեց «Կիլո» դասի սուզանավ («Պալտուս» և «Վարշավյանկա» նախագծեր), որոնք զինված են «Կալիբր» թևավոր հրթիռներով, և կարող են հարվածել ցանկացած եվրոպական մայրաքաղաքի:
