Վերջին օրերին քաղաքում հասարակական տրանսպորտից օգտվելու համար անհրաժեշտ է հագնվել շատ տաք և ունենալ ծով համբերություն, քանի որ մի քանի ուղղություններով ավտոբուսներն ու երթուղային տաքսիները երթևեկում են 15-20 երբեմն էլ 30 րոպե միջակայքով: Եվ դա ոչ միայն երեկոյան ժամերին, այլև առավոտյան՝ աշխատանքի գնալու պիկ ժամերին: Իսկ երեկոյան ժամերին, հատկապես 19:00-ից հետո քաղաքում գրեթե ավտոբուս հնարավոր չէ գտնել, երթուղային տաքսիներն էլ երթևեկում են վերը նշված ժամանակահատվածով:
Եթե քաղաքապետարանը կամ երթուղային գիծը շահագործող ընկերությունը հնամաշ երթուղային տաքսիները փոխարինում է ավտոբուսներով, ապա պարտավոր է մինչև պայմանագրում ֆիքսված որոշակի ժամը ապահովել մարդկանց տեղափոխությունը: Ոչ բոլորը հնարավորություն ունեն ամեն օր օգտվել տաքսի ծառայություններից: Մարդիկ ցանկանում են աշխատանքից հետո, ժամը 18-ին, 19-ին կամ 20-ին հասարակական տրանսպորտով տեղաշարժվել, բայց կարծես դա էլ է արդեն ճոխություն ՀՀ քաղաքացու համար: Ավտոբուսների վատ աշխատելը վերջին օրերին քիչ թե շատ բացատրվում էր ոչ աշխատանքային օրերով, սակայն քանի օր է արդեն աշխատանքային օրեր են, բայց դրանից տրանսպորտի աշխատանքի որակը չի բարելավվել: Հատկապես վատ են աշխատում կամ գրեթե չեն աշխատում 11, 14 համարի ավտոբուսները, որոնք ամիսներ առաջ շատ լավ էլ աշխատում էին: Վատ են աշխատում նաև 57, 7, 8 և մի շարք այլ համարների ավտոբուսներ, 19 համարի երթուղային տաքսին, երեկոյան ժամերին` 12, 52Ա համարները:
Հատկապես ավտոբուսների դեպքում վարորդները պատճառաբանում են, թե դիզվառելիք չկա, դրա համար էլ գիծ դուրս չեն գալիս, իսկ քաղաքապետարանից հերքում են, թե հնարավոր է դիզվառելիքի բացակայության պատճառով ավտոբուսը երթուղի դուրս չգա: «Ես կարող եմ միանշանակ ասել, որ այդ տարբերակը բացառված է, չի կարող այդպիսի բան լինել: Դիզվառելիք չունենալու պատճառաբանությամբ երթուղի դուրս չգալու դեպք չի կարող լինել»,- ի պատասխան մեր հարցմանը ասաց քաղաքապետարանի լրատվության և հասարակայնության հետ կապերի վարչության պետ Արթուր Գևորգյանը:
Վերջինս որևէ կերպ չընդունեց և չհամաձայնեց քաղաքացիների դժգոհության հետ: «Տնտեսվարողն, ի վերջո, ունի պայմանագրային պարտավորություններ և պարտավոր է կատարել այդ պարտավորություններն անկախ ամեն ինչից»,- ասաց նա: Գևորգյանի խոսքով` բացի դա, տրանսպորտի աշխատանքի հետ կապված ամենօրյա մոնիտորինգ է իրականացվում քաղաքապետարանի տրանսպորտի վարչության, «Երևան տրանս»-ի, «Երևան ավտոբուս» ԲԲԸ-ի կողմից: Համապատասխան մասնագետները մոնիտորինգ են անում, վերլուծում են և վերլուծության արդյունքներն ամենշաբաթյա կտրվածքով զեկուցվում են քաղաքապետարան: «Եթե լինում են ուշացումներ, թերացումներ և այլ խնդիրներ, զեկուցվում է: Եթե նորից լինեն նման դեպքեր, անմիջապես քայլեր կձեռնարկվեն»:
Տրանսպորտի վերջին շրջանի վատ աշխատանքը հիմնականում բացատրվում է առաջիկա օրերին տրանսպորտի գնի բարձրացմամբ: Եվ դա գծատերերի կողմից հատուկ կազմակերպված բնույթ է կրում: Նամանավանդ, որ այդպիսի դեպքեր վերջերս եղան, երբ մի քանի տարբեր գծատերեր ի նշան բողոքի հայտարարեցին, որ դուրս չեն գա երթուղի մինչև քաղաքապետարանը ուղեվարձը չդարձնի 200 դրամ: Ուղեվարձը, հիշեցնենք, պետք է թանկանար այս տարվա հունվարի 1-ից, սակայն այդ գործընթացը ժամանակավորապես հետաձգվել է, մինչև Երևանի տրանսպորտի սակագնի հարցերով հանձնաժողովը ավարտի իր աշխատանքները, որից հետո պարզ կդառնա՝ կբարձրանա՞ ներքաղաքային տրանսպորտի ուղեվարձը, թե՞ ոչ…
Արթուր Գևորգյանը չհամաձայնեց նաև այդ վարկածի հետ, թե որոշ երթուղայինների և ավտոբուսների բացակայությունը գծատերերի կողմից հատուկ կազմակերպված է: Նրա համար դա անհիմն և կուլիսներում արվող հայտարարություն է: «Ցանկացած բանական և տրամաբանող մարդ նախևառաջ հենվում է փաստերի, վերլուծությունների և կոնկրետ օրինակների վրա: Անպատասխանատու հայտարարությունները, թե սրա համար է արվում, նրա համար է արվում, մենք չենք կարող հիմք վերցնել: Պետք է փաստերով խոսել»:
Հուսով ենք վերը նշված օրինակներով քաղաքապետարանի համապատասխան վարչությունը վերլուծություն կանի, համապատասխանաբար նաև՝ հետևություններ:
Դե իսկ ոլորտի պատասխանատուն՝ քաղաքապետարանի տրանսպորտի վարչության պետ Հենրիկ Նավասարդյանը թերևս շատ զբաղված է որդու թմրանյութային արկածներով, դրա համար էլ աչքաթող է արել ոլորտը:
