«Ցանկացած թիմով կարելի է գնալ բարեփոխումների, եթե թիմն ունի քաղաքական ուժ, հեղինակություն, պնդություն, ամրություն»,- «Առաջին լրատվական»-ի հետ զրույցում նշել է Հայ-Ռուսական համալսարանի ռեկտոր, նախկին վարչապետ Արմեն Դարբինյանը։
Նա ընդգծեց, որ ինքը միշտ եղել է ոչ թե քաղաքական, այլ պրոֆեսիոնալ սկզբունքներով ձևավորված կառավարության կողմնակից. «Այդ իմաստով, այսօր գործող կառավարությունը պրոֆեսիոնալ չէ, պրոֆեսիոնալ չէր նաև դրանից առաջ գործող կառավարությունը»,-ասաց Արմեն Դարբինյանը։
Հարցին, թե կարելի՞ է եզրակացնել, որ քանի դեռ պրոֆեսիոնալ չէ կառավարությունը, լուրջ ակնկալիքներ չի կարելի ունենալ կառավարությունից, Արմեն Դարբինյանը պատասխանեց. «Նայած ինչ բարեփոխման մասին է խոսքը։ Քաղաքական բարեփոխումների տեսանկյունից կարող ենք ակնկալել լրջագույն բարեփոխումներ։ Այդպիսի բարեփոխումներ պիտի ակնկալենք ու պահանջենք, իսկ տնտեսական, սոցիալական տեսանկյունից դեռևս հարցականներ կան, որովհետև պրոֆեսիոնալ թիմը պետք է իրեն դրսևորի, ինչը դեռ չենք տեսնում»։
Անդրադառնալով Նիկոլ Փաշինյանի հայտարարությունը, որ պետք է շատ արագ հասնել արտահերթ խորհրդարանական ընտրությունների, քանի որ այս անորոշ վիճակն ազդում է ներդրումների վրա, որ ներդրողները սպասում են իրավիճակի կայունացմանը, Արմեն Դարբինյանն ասաց. «Ես ունեմ տրամագծորեն այլ մոդել։ Ես միշտ համարել և համարում եմ, որ Հայաստանը պետք է լինի նախագահական երկիր։ Հայաստանն այսօր էլ իր բնույթով նախագահակ երկիր է։ Սահմանադրության վերջին փոփոխությունը բացարձակ չէր բխում թե՛ Հայաստանի, թե՛ հայ հասարակության, թե՛ բարեփոխումների շահերից։ Առաջնային խնդիր եմ համարում սահմանադրությանը փոփոխությունը և նախագահական կարգավիճակին վերադառնալը։
Կարծում եմ, որ սա պետք է լինի վարչապետ Փաշինյանի անելիքը։ Եթե նա համարում է, որ պետք է շարունակի աշխատել, կառավարել, ղեկավարել երկիրը որպես խորհրդարանական երկիր, իմ տեսակետը տրամագծորեն հակառակ է։ Ես համոզված եմ, որ ճիշտ, ամենառացիոնալ ճանապարհը այն կլիներ, որ բանակցությունների ընթացքում և միջոցով Հայաստանի քաղաքական ու հասարակական դաշտը գար այն համոզմունքին, որ երկրում պետք է վերականգնել նախագահական երկրի Սահմանադրությունը»։
