Ֆեյսբուքյան լրատվալան iNews էջը տեղեկություն է հրապարակել, որ Հալեպում սպանվել է Մինաս անունով հայ երիտասարադ այն բանից հետո, երբ հրաժարվել է իսլամ ընդունել: Էջում հրապարակվել է երիտասարդի լուսանկարը, որի շապիկի վրա պատկերված է Հալեպի Հայ ավետարանչական եկեղեցու տարբերանշանը: Լուսանկարը տարածվել է ակտիվիստների կողմից, հաղորդում է Khabar Armani գործակալությունը:
Նշվում է, որ երիտասարդը սպանվել է Հալեպ քաղաքի հյուսիսում տեղակայված բանտերից մեկում, որը գտնվում է «Դաիշ» («Սիրիայի և Իրաքի իսլամական պետություն») խմբավորման վերահսկողության տակ:
Ակտիվիստների հաղորդագրության համաձայն՝ Մինասը և նրա հայրը 115 օր անցկացրել են բանտում, որից հետո Մինասին սպանել են, երբ վերջինս հրաժարվել է իսլամ ընդունել: Երիտասարադի հոր մասին տեղեկություն չի հաղորդվում:
Նշենք, որ այս տեղկատվությունը այլ աղբյուրներից չհաջողվեց ճշտել:
Khabar Armani գործակալությունն իր հերթին հաղորդում է, որ վերջին 24 ժամվա ընթացքում Սիրիայից ստացվող հաղորդագրությունների համաձայն՝ հայ ընտանիքներին ստիպում են իսլամ ընդունել: Հաղորդվում է նաև, որ օրերս հայերից մեկը, ով հրաժարվել է իսլամ ընդունել, սպանվել է. նրա գլուխը կտրել և դրել են քաղցրավենիքի տուփի մեջ:
Հիշեցնենք, օրերս արաբալեզու AksAlser կայքը տեղեկություն էր տարածել, որ Հալեպի արվարձաններից մեկում երկու հայ ընտանիք իսլամ են ընդունել: Հրապարակման մեջ շեշտվում էր, որ նրանք այդ քայլին գնացել են ինքնակամ՝ առանց պարտադրանքի:
