Լոռու մարզի ընդհանուր իրավասության դատարանում Սուսաննա Գզոգյանի նախագահությամբ ավարտվել է Մհեր Վ.-ի գործի դատական քննությունը:
30-ամյա Մհեր Վ.-ին մեղադրանք էր առաջադրվել երեք մարդու մահվան ելքով վթարի համար՝ ՀՀ քրեական օրենսգրքի 242 հոդվածի 3-րդ մասով:
Ըստ մեղադրանքի՝ 2017 թվականի օգոստոսի 19-ի ցերեկը՝ ժամը 14-ն անց 30-ի սահմաններում, Ալավերդի-Ստեփանավան ավտոճանապարհի 18-րդ կիլոմետրում Մհեր Վ.-ն, վարելով փաստացի իրեն պատկանող «Ֆոլքսվագեն Գոլֆ» մեքենան, թույլ է տվել ՃԵԿ պահանջներին հակասող գործողություններ՝ տեխնիկական տեսակետից ստեղծել է վթարային իրադրություն, դուրս է եկել հանդիպակաց ուղեմաս և բախվել է այդ ուղեմասով ընթացող, ոստիկանության Լոռու մարզային վարչության ուղեկցող դասակի 35-ամյա ծառայող Էդգար Վ.-ի կողմից վարած «Օպել Աստրա» մեքենային:
Մեքենաների ճակատային բախման հետևանքով «Օպել»-ի վարորդ Էդգարի հայրը՝ 58-ամյա Գագիկ Վ.-ն, և 9-ամյա դուստրը՝ Սիրանուշը՝ Վանաձորի դպրոցներից մեկի 3-րդ դասարանի աշակերտուհի, տեղում մահացել են:
Վթարի ժամանակ ստացած վնասվածքներից հետագայում մահացել է նաև Մհեր Վ.-ի մեքենայում գտնված 23-ամյա Մարյամ Մ.-ն:
Վթարի հետևանքով «Օպելի» վարորդ Էդգարի, նույն մեքենայի ուղևորներ, 54-ամյա Սիրանուշ Ս.-ի, 30-ամյա Հերմինե Գ.-ի առողջությանը պատճառվել է ծանր վնաս, «Օպելի» վարորդի 3-ամյա որդու՝ Էրիկի առողջությանը պատճառվել է միջին ծանրության վնաս: «Ֆոլքսվագենի» վարորդ Մհեր Վ.-ի 3-ամյա որդու առողջությանը պատճառվել է ծանր վնաս, իր՝ Մհեր Վ.-ի առողջությանը պատճառվել է ծանր վնաս:
Մհեր Վ.-ն իրեն լիովին մեղավոր է ճանաչել:
Դատարանը հաշվի է առել, որ Մհեր Վ.-ի խնամքին են հաշմանդամություն ունեցող, վթարի հետևանքով ծանր վնասվածք ստացած 3-ամյա որդին ու 2 տարեկան դուստրը: Ինքը՝ Մհեր Վ.-ն 3-րդ խմբի հաշմանդամություն ունի:
Գործի քննության ընթացքում տուժող Էդգար Վ.-ն ներկայացրել է 7 միլիոն դրամի քաղհայցի պահանջ՝, որպես իր հոր ու դստեր հուղարկավորության, իր և իր մեքենայում գտնվող մյուս տուժողների բուժման ծախսերի հատուցում:
Մհեր Վ.-ն ամբողջությամբ ընդունել է քաղհայցի պահանջը:
Դատարանը Մհեր Վ.-ին մեղավոր է ճանաչել ՀՀ քրեական օրենսգրքի 242 հոդվածի 3-րդ մասով և դատապարտել է 5 տարի իրական ազատազրկման՝ 3 տարով զրկելով տրանսպորտային միջոցներ վարելու իրավունքից:
Մհեր Վ.-ից հօգուտ Էդգար Վ.-ի կբռնագանձվի 7 միլիոն դրամ՝ որպես պատճառած նյութական վնասի հատուցում:
Պատժի սկիզբը կհաշվվի Մհեր Վ.-ին փաստացի կալանքի տակ առնելու պահից, երբ այս դատավճիռն օրինական ուժի մեջ մտնի:
