Երուսաղեմում Սուրբ ծնունդը կտոնեն հունվարի 18-19-ին: Այս մասին «Առաջին լրատվական»-ի հետ զրույցում նշեց Երուսաղեմի հայոց պատրիարքության էկումենիկ և արտաքին հարաբերությունների բաժնի տնօրեն, Պատրիարքության պաշտոնական մամուլի խոսնակ Արիս արքեպիսկոպոս Շիրվանյանը: Նա նշեց, որ սա Հայաստանում թեև անվանում են Փոքր զատիկ, սակայն սխալ է. Սուրբ ծնունդը պետք է կոչել իր անունով՝ որպես Աստվածհայտնության տոն: Իսկ Սուրբ զատիկը հարության տոնն է, որ այս տարի կտոնենք ապրիլի 20-ին:
Նա նշեց, որ Երուսաղեմում հին տոմարով են տոնում տոները, և քանի որ հին և նոր տոմարների միջև 13 օրերի տարբերություն կա, այդ պատճառով նոր տոմարով Սուրբ ծնունդը կհամընկնի հունվարի 19-ին:
Արիս սրբազանը ներկայացրեց արարողակարգը. հունվարի 18-ին՝ առավոտյան ժամը 10:00-ին, միաբանությունը՝ պատրիարքի գլխավորությամբ և իսրայելյան ոստիկանության ուղեկցությամբ, շքերթով դուրս է գալու Երուսաղեմից մինչև Բեթղեհեմի սահմանագլուխը, որտեղ կարճատև հանդիպում կունենան Բեթղեհեմի և շրջակայքի քաղաքապետերը, կհանդիպեն պատրիարքին, կշնորհավորեն տոնի կապակցությամբ և մի փոքր կոնյակ կհյուրասիրվեն, ապա շքերթը կշարունակվի դեպի Պաղեստին՝ Պաղեստինի ոստիկանության առաջնորդությամբ:
Արդեն Բեթղեհեմի Սուրբ ծննդյան հրապարակում կդիմավորեն քաղաքապետուհին, և նաև շրջակայքի քաղաքապետերը կողջունեն պատրիարքի գալուստը, ապա Ծննդյան շարականը երգելով՝ միաբանությունը կմտնի Սուրբ ծննդյան վանքը, որտեղ շնորհավորական խոսքեր կհնչեն քաղաքապետի և նախագահ Աբասի ներկայացուցչի կողմից:
Այնուհետև հունվարի 18-ի երեկոյան կկատարվի ժամերգություն, որին կհաջորդի ճրագալույցի պատարագը ծննդյան տաճարում՝ մինչև ժամը վեցը:
Ավարտից հետո՝ ժամը 19:00-ին, վանքի սրահում տեղի կունենա պաշտոնական հյուրասիրություն, որտեղ ներկա կլինեն Պաղեստինի նախագահը, վարչապետը, նախարարներ, պետական այլ պաշտոնյաներ և հայ համայնքի ներկայացուցիչներ: Կհնչեն ողջույնի խոսքեր, ապա հյուրասիրություն, իսկ ժամը 22:00-ին ժամերգություն կսկսեն մինչև 24:00-ը: Կեսգիշերից հետո՝ մինչև առավոտյան վեցը, տեղի կունենա երկու պատարագ, իսկ այդ արարողությանը ներկա կգտնվեն Հայաստանից և այլ վայրերից եկած ուխտավորներ:
