«Առաջին լրատվական»-ը ներկայացնում է վերջին մի քանի օրերի ընթացքում հանրապետության տարածքում արձանագրված հանցավորության դեպքերը՝ ըստ ՀՀ ոստիկանության պաշտոնական կայքէջի տեղեկատվության:
Հունվարի 3-ին՝ ժամը 19:40-ին, ոստիկանության Նոր Նորքի բաժին է դիմել 1976 թ. ծնված Կարեն Դ.-ն և հաղորդում տվել, որ 2013 թ. դեկտեմբերի 24-ին՝ ժամը 21:00-ի սահմաններում, իր ծանոթը` 1995 թ. ծնված Կարլեն Ն.-ն, ընտանեկան խնդիրներ ունենալու և տուն վերադառնալու ցանկություն չունենալու պատրվակով, գիշերելու համար խնդրել է տրամադրել իր «Օպել Աստրա» մակնիշի ավտոմեքենան:
Նույն օրը՝ ժամը 23:00-ի սահմաններում, Նորքի 5-րդ զանգվածի Գալշոյան փողոցի թիվ 18 շենքի բակում ավտոմեքենան բանալիների հետ տվել է Կարլեն Ն.-ին նույն բակում ավտոմեքենայի մեջ գիշերելու պայմանով, սակայն դեկտեմբերի 25-ին՝ ժամը 08:00-ի սահմաններում, հայտնաբերել է, որ Կարլեն Ն.-ն ավտոմեքենայի հետ անհետացել է՝ խաբեությամբ տիրանալով դրան, իսկ հետագայում տեղեկացել է, որ Էջմիածին քաղաքում վերջինս ավտոմեքենան վաճառել է ոմն Մայիսի:
Վնասի չափը պարզվում է: Ձեռնարկվում են միջոցառումներ՝ Մայիսի անձը պարզելու և նրան ու ավտոմեքենան հայտնաբերելու ուղղությամբ: Կատարվում է հետաքննություն:
Ոստիկանության Տարոնի բաժնի ծառայողները, օպերատիվ տվյալներն իրացնելիս, գողություն կատարելու կասկածանքով, հունվարի 4-ին՝ ժամը 22:30-ին, Գուգարք գյուղից բերման են ենթարկել 1994 թ. ծնված Աշոտ Ա.-ին, որի մոտից անձնական խուզարկությամբ հայտնաբերվել է կանացի պայուսակ՝ 11 զույգ պիտակներով կանացի ականջօղերով (բիժուտերիա): Աշոտ Ա.-ն բացատրություն է տվել, որ ոմն Անուշավանի հետ հունվարի 2-ին՝ ժամը 01:00-ի սահմաններում, Մյասնիկյան թիվ 1 հասցեում գործող տոնավաճառի խանութներից մեկի պատուհանը պտուտակահանով բացելով, գողացել են նշված իրերը: Ձեռնարկվում են միջոցառումներ Անուշավանի անձը պարզելու, նրան և տուժողին հայտնաբերելու ուղղությամբ: Նշանակվել է դատաապրանքագիտական փորձաքննություն: Վնասի չափը պարզվում է: Կատարվում է հետաքննություն:
Ոստիկանության Իջևանի բաժնի ծառայողները, իրացնելով օպերատիվ տեղեկությունները, հունվարի 4-ին՝ ժամը 21:30-ին, Իջևան քաղաքի Չռչռ կոչվող տարածքից բերման են ենթարկել 1992 թ. ծնված Լևոն Մ.-ին, որը խոստովանել է, որ հունվարի 4-ին՝ ժամը 03:00-ի սահմաններում, խնջույքի ժամանակ, Իջևան քաղաքի հյուրանոցային համալիրներից մեկի սենյակի ներքնակի տակից գողացել է 25.000 դրամ:
Գողոնն առգրավված է: Կատարվում է հետաքննություն:
