Երեկ Ռուսաստանի արտգործնախարար Սերգեյ Լավրովն ասել էր, որ մոտ ժամանակներս հանդիպում կկայանա ՌԴ նախագահ Վլադիմիր Պուտինի ու Հայաստանի վարչապետ Նիկոլ Փաշինյանի միջև: «Պետք է հասկանալ՝ ինչպես է Հայաստանի նոր ղեկավարը գնահատում իր երկրում զարգացման հեռանկարները: Մենք անտարբեր չենք այն հարցին՝ ինչպես է նման իրավիճակում պետությունը կատարելու ՀԱՊԿ-ի շրջանակում ստանձնած պարտավորությունները»,- եզրափակել էր ՌԴ արտգործնախարարը:
Հայ-ռուսական բարձր մակարդակի բանակցությունները տեղի կունենան սեպտեմբերի 8-ին, Մոսկվայում․ այս մասին այսօր տեղեկացրել է Ռուսաստանի նախագահի մամուլի քարտուղար Դմիտրի Պեսկովը, ու այդ տեղեկատվությունը հաստատել է Նիկոլ Փաշինյանը լրագրողների հետ ունեցած հանդիպման ժամանակ։
Դատելով Պեսկովի ու Փաշինյանի հրապարակային բացատրություններից՝ Պուտին-Փաշինյան հանդիպումը դարձյալ աշխատանքային է, ու Փաշինյանի մոսկովյան այցը պաշտոնական չէ։ Սա իրականում կարևոր հանգամանք է, որովհետև Մոսկվայում, ըստ ամենայնի, կարծում են, որ դեռ չի հասունացել պաշտոնական այցի մակարդակով Փաշինյանին Մոսկվայում հյուրընկալելու պահը։ Ի դեպ, սա էլ է փաստ, որը խոսում է հայ-ռուսական հարաբերությունների ճգնաժամի մասին, մանավանդ, որ սեպտեմբերի 1-ին Իլհամ Ալիևը Սոչիում էր պաշտոնական այցով, որի ավարտին ստորագրվեց 16 փաստաթուղթ։
Ադրբեջանն աննախադեպ ինտեգրացիա է սկսել Ռուսաստանի հետ՝ քաղաքական, մշակութային, փորձագիտական, բիզնես դաշտի, լրատվական շրջանակների տոտալ ինտեգրացիա։ Մենք ակնհայտորեն այստեղ սկսում ենք զիջել։ Անկեղծ ասած՝ Մոսկվան առայժմ չի էլ ձգտում վերականգնել պարիտետի բաղադրիչն իր տարածաշրջանային քաղաքականության մեջ։
Ավելին՝ Լավրովի երեկվա ելույթից այնպիսի տպավորություն ստեղծվեց, որ Պուտինը Փաշինյանին կանչում է Մոսկվա՝ նրանից Հայաստանի ներքին կյանքի վերաբերյալ պարզաբանումներ ստանալու նպատակով։ Փաշինյանին դուր չի եկել իրեն վերապահված «ծույլիկ աշակերտի» կարգավիճակը, ու նա այսօր ակնհայտորեն հեգնական պատասխան է տվել Ռուսաստանի արտգործնախարարին։ Անդրադառնալով Լավրովի այն հայտարարությանը, որ Հայաստանում ներքաղաքական իրավիճակը շարունակում է եռալ, վարչապետը լրագրողներին ասել է. «Դե, շոգ էր այսօր բավականին, իսկապես»:
Փաշինյանն այսօր հնարավորինս փորձել է մեղմել նաև Քոչարյանին հասցեագրված՝ Պուտինի շնորհավորական հեռախոսազանգի քաղաքական հետևանքը։ «Դա անձնական հարաբերությունների հարթակում էր: Հասցնելով ճանաչել ՌԴ նախագահին՝ կարող եմ ասել, որ նա մարդկային կապերը շատ գնահատում է և պահպանում է կապն աշխարհի տարբեր երկրների նախկին և ներկա ղեկավարների հետ: Տեսաք, որ վերջերս Եվրամիության հետ բավականին պրոբլեմատիկ հարաբերություններ ունեն, բայց նա մասնակցեց ավստրիացի բարձրաստիճան պաշտոնյայի հարսանյաց արարողությանը»,-ասել է վարչապետը:
Անկեղծ ասած՝ Նիկոլ Փաշինյանի փաստարկներն այնքան էլ համարժեք չեն։ Նախ՝ Պուտինը նախորդ տարիներին Քոչարյանին չի շնորհավորել, համենայնդեպս՝ երկրորդ նախագահի պաշտոնաթողությունից հետո Կրեմլի պաշտոնական կայքում որևէ հիշատակում չկա այն մասին, որ Քոչարյանն իր ծննդյան օրը շնորհավորական ուղերձ կամ հեռախոսազանգ է ստացել Պուտինից։ Մյուս կողմից՝ Ավստրիայի ԱԳ նախարարի հարսանիքին Պուտինի մասնակցելու հանգամանքը խոսում է հենց հակառակ միտումի մասին․ նույնիսկ անձնական միջոցառումները Ռուսաստանի նախագահը փորձում է օգտագործել քաղաքական նպատակներով։ Ավստրիան այն սակավաթիվ եվրոպական պետություններից մեկն է, որն, ըստ էության, չի պաշտպանում ԵՄ կոնսոլիդացված պատժամիջոցները Ռուսաստանի դեմ։
Ինչևէ, Փաշինյանին սեպտեմբերի 8-ին Մոսկվայում սպասվում են բարդ բանակցություններ, որոնք ինչ-որ իմաստով շրջադարձային կարող են լինել։ Հայ-ռուսական հարաբերությունները գտնվում են սահմանագծային վիճակում․ Ռուսաստանն ակնհայտորեն փորձում է դրանցում վերականգնել վասալային ռեժիմը, Հայաստանը պետք է կարողանա հասնել վերջին ամիսների փոխված ստատուս քվոյի ամրագրմանը՝ այն դուրս բերելով ստագնացիայի փուլից։ Դատելով Լավրովի ասածին Փաշինյանի արած ռեպլիկից՝ նա Մոսկվա է մեկնում նոր իրողությունները պաշտպանելու նպատակով։
