Ադրբեջանի Միլի մեջլիսի պատգամավոր, «Իրավական հարցերի և պետական շինարարության» հանձնաժողովի նախագահ Ալի Հուսեյնլին ադրբեջանական ԶԼՄ-ներից մեկին տված հարցազրույցում հայտարարել է, որ խելամիտ կլիներ, եթե դիտարկվեր Ադրբեջանի՝ ՀԱՊԿ անդամակցության հարցը։
ՀԱՊԿ անդամ դառնալու Հուսեյնլիի գլխավոր թեզիսներն են՝ ՀԱՊԿ անդամ դառնալով Բաքուն կկարողանա հետ վերադարձնել, այսպես կոչված, «օկուպացված» տարածքները, նախնական համաձայն է հետ ստանալ Ջաբրայիլը, Ֆիզուլին և Զանգելանը, էժան գնով զենք կգնի Մոսկվայից։ Ստացվում է՝ Հուսեյնլիի շուրթերով Իլհամ Ալիևը Մոսկվային հասկացնում է, թե ինչի դիմաց է Ադրբեջանը պատրաստ դառնալ ՀԱՊԿ անդամ։
Պատգամավորը նաև հիշեցնում է, որ ՀԱՊԿ անդամ Ղազախստանը, Բելառուսը և Տաջիկստանն ավելի շատ Ադրբեջանի ընկերներն են, քան Հայաստանի։
«Առաջին լրատվական»-ի հետ զրույցում, մինչդեռ, REGNUM գործակալության գլխավոր խմբագիր, քաղաքագետ Մոդեստ Կոլերովը նշեց՝ այն քաղաքական ռեժիմը, որ կա այսօր Ադրբեջանում, ստիպում է համարել ցանկացած պատգամավորի ցանկացած հայտարարություն ցանկացած թեմայի շուրջ առ ոչինչ։ «Դրանք ոչինչ չեն նշանակում։ Եթե Բաքվում որևէ մեկը համարում է, որ այդ հայտարարությունը կարող է ազդակ լինել՝ նա հիմար է։ Մենք՝ Ադրբեջանում չապրողներս, գիտենք, որ Ադրբեջանի պատգամավորների հայտարարությունները զրո նշանակություն ունեն»,- ասաց քաղաքագետը։
Հարցին՝ արդյոք հնարավոր է, որ Հայաստանն ու Ադրբեջանը գտնվեն նույն կազմակերպության մեջ, Մոդեստ Կոլերովն արձագանքեց. «Հայաստանն ու Ադրբեջանը արդեն նույն կազմակերպության մեջ են»։ Դիտարկմանը, թե նկատի ունեմ կոնկրետ ՀԱՊԿ-ը, քաղաքագետը նշեց. «Ո՛չ։
Հայաստանն ու Ադրբեջանը չեն կարող գտնվել նույն ռազմական կազմակերպությունում»։
Հետաքրքրվեցինք նաև՝ արդյոք եթե Ադրբեջանը նման ցանկություն հայտնի, Ռուսաստանը կկանգնի ընտրության առաջ՝ Հայաստանի և Ադրբեջանի միջև, Մոդեստ Կոլերովը պատասխանեց. «ՀԱՊԿ-ում բոլոր որոշումներն ընդունվում են կոնսենսուսի միջոցով։ Ռուսաստանն այստեղ կապ չունի»։
