«Ես համոզված եմ, որ Մարտի 1-ը մինչև վերջ բացահայտվելու է»,- «Առաջին լրատվական»-ի հետ զրույցում ասաց ԱԺ նախկին պատգամավոր Ռուբեն Հակոբյանը՝ անդրադառնալով ՀՀ նախկին վարչապետ Հովիկ Աբրահամյանին պատկանող գործարանում հայտնաբերված զենք-զինամթերքին:
Մեր զրուցակիցը կարծում է, որ արդարադատությունը պետք է ի վերջո իր դերը կատարի, պետք է հասկանանք, որ ունենք արդարադատություն և պաշտպանված ենք օրենքով. «Ճշմարտությունը չի կարող կիսատ լինել, կիսատ ճշմարտությունն ավելի վտանգավոր է, քան բացահայտ սուտը: Արդարադատությունը չպետք է լինի սելեկտիվ»:
Ռուբեն Հակոբյանի խոսքով՝ Մարտի 1-ը ինքը դիտարկում է պատճառահետևանքային կապի մեջ. «Պատճառը եղել է 96 թիվը՝ բոլոր մյուս դեպքերը և նույնիսկ ավելին՝ Հոկտեմբերի 27-ը, հետևանք էին. մենք ստեղծեցինք ավանդույթ, որ օրվա իշխանությունը կարող է սահմանադրական կարգը տապալելով՝ զավթել իշխանությունը, և չէր մնում այլ ելք, քան գնալ տարբեր քայլերի, որը խարան դարձավ պետության համար: Այդ հրեշները՝ դիպուկահարները, ծնվեցին 95-96 թվականներին»:
Ինչ վերաբերում է 2008-ին սահմանադրական կարգի տապալմանը, Ռուբեն Հակոբյանը նշեց որոշ մտահոգություններ, օրինակ՝ «Վիկիլիքսի» հրապարակմամբ քրեական գործ հարուցելը: Մեր զրուցակիցը հարց բարձրացրեց՝ արդյոք տուժե՞ց, թե՞ շահեց Ռոբերտ Քոչարյանը, երբ նրան կալանավորեցին. «Ռոբերտ Քոչարյանին կալանքի տակ պահելը, իմ կարծիքով, նպաստավոր է նրա համար»:
Մանրամասները՝ տեսանյութում:
