«Նոր ընտրություններին իշխանությունների հետ համատեղ ցուցակով մասնակցելու խոսք չկա։ Իսկ առանձին լինելը նշանակում է առանձին քաղաքական օրակարգ, եթե նույնը լիներ՝ իմաստ չէր ունենա առանձին ներկայանալ»- «Առաջին լրատվական»-ի հետ զրույցում ասաց «Հանուն Հայաստան պետության» ճակատի անդամ Ալեք Ենիգոմշյանը։
Մեր զրուցակիցը շեշտում է՝ իրենք այժմ ամբողջությամբ սատարում են ներկայիս վարչակազմին՝ Նիկոլ Փաշինյանի գլխավորությամբ. «Իհարկե մենք նաև հասկանում ենք, որ ելնելով որոշ ռեալպոլիտիկ իրականություններից՝ իշխանությունը կաշկանդված է որոշ հարցերում՝ հատկապես արտաքին քաղաքականությանը վերաբերյալ և հատկապես Հայաստանի լիակատար ինքնիշխանության, սուվերենության հետ կապված։
Մեր շարժումը կներկայանա ընտրություններին և լիահույս ենք, որ հաջողություն կունենա, հետամուտ կլինենք և՛ ներքին, և՛ արտաքին քաղաքականության ոլորտում անհրաժեշտ փոփոխություններին, հատկապես ինքնիշխանության հետ կապված շատ սկզբունքային կեցվածք կունենանք»- ասաց Ենիգոմշյանը՝ շեշտելով, որ իրենք գործող իշխանություններին խիստ չեն հակադրվելու։
Օրերս վարչապետ Նիկոլ Փաշինյանը լրագրողի այն հարցին, թե արդյոք կհամագործակցի «Սասնա ծռեր»-ի հետ, պատասխանել է. «Սասնա ծռեր» քաղաքական կազմակերպության մասին ինձ հայտնի չէ, եթե նկատի ունեք «Սասնա ծռեր» խմբի գործունեությունը, ինչպես տեղյակ եք՝ նրանց գործով դատավարություն է ընթանում և անհասկանալի է ինձ հարցնել, թե արդյոք ես նրանց հետ կգնամ համագործակցության»։
Անդրադառնալով վարչապետի այս արձագանքին, Ալեք Ենիգոմշյանը նշեց. «Ես պարոն վարչապետի այդ հայտարարությանը շատ նորմալ եմ վերաբերվում, արտառոց ոչինչ չի ասել։ Այո՛, մենք միշտ էլ ասել ենք, որ «Սասնա ծռեր» բառակապակցությունը քաղաքական իմաստով առաջացավ «Սասնա ծռեր» խմբի գործողության արդյունքում։
Դա նաև բացի զինյալ, ապստամբական գործողություն լինելուց՝ առաջին հերթին քաղաքական հայց էր, այսինքն՝ խնդիրների հստակ քաղաքական դիրքորոշում ունի։ Բայց ինքն այդպես հանդես չի եկել, այդ իմաստով պարոն Փաշինյանի ասածի մեջ որևէ արտասովոր բան չկա, և ես այդ հայտարարությունը շատ բնական եմ համարում»,- եզրափակեց նա։
