Երբ Սերժ Սարգսյանը մինչ վարչապետի պաշտոնը ստանձնելը վարչապետի լիազորությունների շրջանակն էր ընդլայնում, Նիկոլ Փաշինյանը և ընդդիմությունը նշում էին, որ սա սուպերվարչապետություն է և այդպիսի լիազորությունները վտանագավոր են երկրի համար: Այս իրավիճակում, երբ «Ելք» դաշինքը խորհրդարանում չունի մեծամասնություն, և ՀՀԿ-ն է թվով ամենամեծ խմբակցությունը ԱԺ-ում, շատերն արդարացված են համարում սուպերվարչապետությունը, որը հնարավորություն է տալիս հավասարակշռել խորհրդարանական կազուսային իրականությունը:
«Առաջին լրատվական»- ի հետ զրույցում անդրադառնալով այս դիտարկմանը սահմանադրագետ Վարդան Այվազյանը նշեց. «Սուպերվարչապետական իշխանության իրացումը կարող է դառնալ մեծ բարիք, եթե սուպերվարչապետության կրողը պետականամետ մտածելակերպ ունի և իր բոլոր ջանքերը գործադրում է պետականության, մարդկանց իրավունքների, արժանապատվության պաշտպանության համար: Եվ դա կարող է դառնալ չարիք, եթե կիրառվում է անձնական շահերի համար: Սա պայմանավորված է մարդու անձնային որակներով: Եթե որակը համարժեք է պետական մտածելակերպին, ապա հատկապես հետհեղափոխական շրջանակում սուպերվարչապետությունը օդ ու ջրի պես անհրաժեշություն է»:
Սահմանադրագետի կարծիքով՝ անհրաժեշտ է, որ հանրաքվեով սահմանադրական փոփոխություններ իրականացվեն:
Նրա խոսքով՝ երբ կառավարություն է փոխվում, միանշանակ լուծումը միանգամից արտահերթ խորհրդարանական ընտրություններն են: «Բայց քանի որ մեզ մոտ խորհրդարանի լուծարման կանոնակարգ գրեթե չկա, հայտնվել ենք այս փակուղային վիճակի մեջ: Որքան ուշ լինեն ընտրությունները, այնքան լավ կլինի ՀՀԿ-ի համար: Շտապ արտահերթ ընտրությունները ձեռնտու են Նիկոլ Փաշինյանին»,- ընդգծեց Այվազյանը:
Մանրամասն՝ տեսանյութում:
