Այս տարվա նոյեմբերի 28-ին «Հայաստան» համահայկական հիմնադրամն անցկացրեց 16-րդ համահայկական հեռուստամարաթոնը, որի արդյունքում, ինչպես հայտնի է, հավաքվեց 22 միլիոն 661 հազար 372 դոլար նվիրատվություն, որի մի մասը դեռևս խոստումների տեսքով է: «Հայաստան» համահայկական հիմնադրամից փորձեցինք պարզել՝ արդեն կարո՞ղ են ասել, թե խոստումների քանի տոկոսն է իրականություն դարձել, և արդյոք հրապարակված գումարը փոփոխության ենթարկվե՞լ է:
«Մենք հրապարակել ենք 21 միլիոն և մի քիչ էլ ավել, որի մեջ մտնում են նաև նվիրատվության խոստումները: Հիմա, երբ գործընթաց է գնում, և նվիրատվության որոշ խոստումներ դառնում են իրականություն, դրանից հանրագումարը, այսինքն՝ հրապարակված վերջնական թիվը, չի փոխվում»,-«Առաջին լրատվական»-ին փոխանցեց հիմնադրամի հասարակայնության հետ կապերի բաժնի պատասխանատու Հասմիկ Գրիգորյանը՝ հավելելով, որ ամիսներ են հարկավոր, որպեսզի նվիրատվության խոստումները դառնան փաստացի նվիրատվություններ: «Միայն ամիսներ անց՝ գարնանը նոր միայն, կարող ենք ասել, թե հայտարարված գումարի որ մասը դարձավ փաստացի փոխանցում: Հիմա դեռ ընդունում ենք փոխանցումներ: Սակայն հաշվի առնելով նախորդ տարիների փորձը՝ խոստումների 90-95 տոկոսը դառնում է իրականություն»:
Նշենք, սակայն, որ 90-95 տոկոսը երբեք իրականություն չի դառնում: Հիմնադրամի որոշ ներկայացուցիչների խոսքով՝ խոստումների առավելագույնը 60-65 տոկոսն է վերածվում իրական նվիրատվության, այն էլ խոստացված ամբողջ գումարը չի տրվում, այլ ավելի համեստ ինչ-որ թիվ: Այս ամենից հետևում է, որ հիմնադրամի հրապարակած թվերը ուռճացված են:
Մարաթոնից մի քանի ամիս անց, երբ ամփոփվում են վերջնական արդյունքները, պարզ է դառնում իրական պատկերը, որը, սակայն, հանրությանը հասանելի չի դառնում: Ինչը ևս նպատակ է հետապնդում՝ չհիասթափեցնել խոշոր նվիրատուներին, ինչպես նաև հազարավոր հավատարիմ նվիրատուների, ովքեր ամսեամիս իրենց թոշակից, նպաստից կամ այլ միջոցներից նվիրաբերում են հիմնադրամին:
«Առաջին լրատվական»-ի տեղեկություններով՝ այս տարի նպատակ էր դրվել հավաքել 30 միլիոն դոլար, որը պետք է ուղղվեր Հայաստանը Լեռնային Ղարաբաղին կապող Վարդենիս-Մարտակերտ 116 կիլոմետրանոց ավտոճանապարհի շինարարությանը: Բայց, փաստորեն, նույնիսկ ուռճացված թվերով չհասան դրան:
