ԵՊՀ բանասիրական ֆակուլտետի դոցենտ, լեզվաբան Նարինե Դիլբարյանը, վերլուծաբան Արմեն Բաղդասարյանը և փաստաբան Հայկ Ալումյանն այսօր «Առաջին լրատվական»- ի տաղավարում ներկայացրին Մարտի-ի 1-ի գործի բացահայտման հետ կապված իրենց դիտարկումները:
Անդրադառնալով օրերս խորհրդարանում հնչած այն հայտարարությանը, թե պետք է գնալ Մարտի 1-ի հետագծով՝ Հայկ Ալումյանը նշեց, որ հնարավոր է և պարտադիր պետք է գնալ Մարտի 1-ի հետագծով: «Մարդիկ են սպանվել, և սպանությունները պետք է բացահայտվեն: Պետք է պարզվեն՝ ովքեր են կատարել, ովքեր են հրահանգ տվել, ինչ շարժառիթներ են եղել… Համոզված եմ, որ գործի բացահայտումը տեխնիկապես հնարավոր է, ավելին՝ հեշտ բացահայտվող սպանություններ են, ուղղակի անհրաժեշտ է կամք՝ ոչ միայն երկրի բարձրագույն իշխանության, այլ նաև միջին և ստորին օղակում՝ քննություն իրականացնողների կամքը: Կհամարեմ Մարտի 1-ի դեպքերը բացահայտված այն դեպքում, երբ կբացահայտվեն նաև այն անձինք, ում հրահանգով այս տարիների ընթացքում այդ գործը պարտակվել է»,- նշեց փաստաբանը:
«Վստահ եմ, որ կբացահայտվեն անմիջական կատարողները և միջին օղակների հրամանատարները, բայց կարծում եմ, որ Մարտի 1-ը կազմակերպիչների մասով մինչև վերջ չի բացահայտվի: Կարծում եմ՝ Քոչարյանի և Սարգսյանի մասով նոր իշխանությունը մինչև վերջ չի գնա»,- նշեց Ա. Բաղդասարյանը՝ հավելելով, որ նոր իշխանություններն այդ տևական գործընթացը կծառայեցնեն ներքաղաքական խնդիրներին, որպեսզի նախկի իշխանությունները հանգիստ մնան, շատ չակտիվանան: «Մարտի 1-ի ամբողջական բացահայտումը հարցերի խաչմերուկ է, հարցերի կծիկ է, բացահայտումն ամբողջական չի լինի ինչպես ներքին, այնպես էլ գուցե արտաքին պատճառներով»,- նշեց վերլուծաբանը:
«Այս քաղաքական փոփոխությունները ոչ միայն նպաստում են, այլ նաև պահանջում են, որ Մարտի 1-ը բացահայտվի իր ամբողջական ծավալով,- նշեց Նարինե Դիլբարյանը: – Մարտի 1-ը «ուչաստկովիի» գործ է, և բացահայտելու համար պետք է քաղաքական կամք: Հասունացել է բացահայտման պահը»:
«Դատական համակարգը պետք է փոխվի, եղած դեմքերով՝ նախկին գործունեությանը սովոր մարդկանցով չափազանց դժվար է նոր արդարադատություն կառուցել»,- ընդգծեց լեզվաբանը:
Մանրամասն՝ տեսանյութում:
