Վրաստանը շատ է մոտեցել ՆԱՏՕ-ին, կարծում է դաշինքի գլխավոր քարտուղար Անդերս Ֆոգ Ռասմուսենը, հայտնում է Trend-ը:
Նա ողջույնի խոսքով հանդես է եկել Վրաստան-ՆԱՏՕ հանձնաժողովի նիստում:
«Մենք մեծ ճաապարհ ենք անցել Վրաստան-ՆԱՏՕ հանձնաժողովի ստեղծումից հետո: Մենք ևս մի քիչ մոտեցել ենք խոստումը կատարելուն, որը կապված է ՆԱՏՕ-ին Վրաստանի անդամակցության հետ: Մենք ամուր և ուժեղ գործընկերություն ենք ձևավորել, որը հիմնված է ընդհանուր արժեքների և Վրաստանում բարեփոխումներին աջակցելու ծրագրի վրա»,- ասել է Ռասմուսենը:
Նրա խոսքով՝ վերջին տարիներին Վրաստանը մեծ ներդրում է ունեցել անվտանգության գործում և աֆղանական առաքելության հիմնական մասնակից երկրներից է:
«Դուք խոստացաք, որ 2014-ից հետո կաջակցեք Աֆղանստանի անվտագության ուժերին: Դուք նաև ներգրավված եք մեր ծրագրում, որի նպատակն աֆղանական ուժերի պատրաստումն է, նրանց օգնելը: Վրաստանը նաև որոշել է իր ներդրումն ունենալ ՆԱՏՕ-ի արագ արձագանքման ուժերում»,- ասել է Ռասմուսենը:
Նրա խոսքով՝ Վրաստանը շատ բան է արել նաև երկրի ներսում: Տպավորիչ բարեփոխումներ են իրականացվել պաշտպանության ոլորտում: Ժողովրդավարությունն ավելի ամուր է՝ հաշվի առնելով Վրաստանում անցկացված նախագահական ազատ ընտրությունները:
«Դաշինքը հաստատուն է ձեզ աջակցելու պատրաստակամության մեջ: Մենք հաստատուն կերպով աջակցում ենք ձեր ինքնավարությունն ու միջազգայնորեն ընդունված սահմանների ամբողջականությունը»,- ասել է Ռասմուսենը:
